Tal frå Vegtrafikksentralen viser at det i 2011 var totalt sju driftsavvik på ferjesambandet Lavik-Oppedal på E39 over Sognefjorden. Året etter, i 2012 var det talet seks, men berre på to og ein halv månad i 2013 har det vore fem driftsavvik.
Seinast i går, då bilistane måtte bu seg på timevis med venting etter at ei ferje fekk motorproblem og vart liggande å sperre for kaia på Lavik.
Gitle Sande som er dagleg leiar i transportfirmaet Nistad Transport på Sande er oppgitt.
– Om dei tala er korrekte i forhold til at det tidlegare har vore seks, sju hendingar på eit heilt år, så er dette ei dårleg utvikling.
– Det er ikkje særleg bra, seier han til NRK.no.
Ferja sperra for kaia i fleire timar
Mykje gjekk gale for Fjord1 måndag kveld. Då dei seint på ettermiddagen fekk motorhavari på bilferja MF Lifjord fekk bilistane beskjed om forseinkingar på Lavik-Oppedal. Med ei ferje ute av drift måtte det tungt trafikkerte sambandet greie seg med ei ferie.
Men så vart det verre. Ferja Lifjord vart liggande å sperre for kaia på Lavik, og sambandet måtte i staden gå mellom Oppedal og Rysjedalsvika, ei ferjekai som ligg over 20 kilometer unna Lavik.
Ferja sperra for kaien i fleire timar, og det vart mange timar venting på dei mange som skulle over Sognefjorden i går kveld.
- LES OGSÅ:
- LES OGSÅ:
Kan fort bli dyrt for transportørane
Gitle Sande i Nistad Transport hadde sjølv seks sjåførar som vart råka av problema. Han seier slike episodar får både økonomiske og praktiske konsekvensar for dei som driv transport.
– Ein konsekvens er at sjåførane brukar mykje lenger tid, og i går hadde vi direkte lønskostnader på 5000 kroner ekstra.
– Men det verste er at sjåførane blir forseinka til neste oppdrag.
For lastebilsjåførane må rette seg etter strenge køyre- og kviletidsreglar, og blir dei forseinka i nokre timar kan det fort få følgjer for både den dagens arbeidsøkt og dagane etterpå.
– Om dei kjem seint fram og får starta døgnkvilen seint, så får det konsekvensar for neste dag. Det forskyvar seg heile tida, og i verste fall kan det føre til at dei ikkje rekk å laste neste dag. Då kan det fort bli snakk om mykje pengar, seier Sande til NRK.no.
Medan det i snitt var 35 prosent færre som måtte stå att på kaien på alle Fjord1 sine ferjesamband i Norge i 2012, var det på Lavik-Oppedal heile 40 prosent fleire som måtte stå att.
- LES OGSÅ:
- LES OGSÅ:
(Artikkelen held fram under biletet)
– Vi synest det er lite
Tala frå Vegtrafikksentralen viser altså at Fjord1 har hatt nesten like mange driftsavvik på Lavik-Oppedal så langt i år som dei hadde i heile fjoråret. Produksjonssjef i Fjord1, Oscar Bergheim, meiner uansett at fem driftsavvik ikkje er det store talet.
– Vi meiner at vi ikkje har hatt så mange driftsstogg til no i år. Før gårsdagen hadde vi ein fire-fem kansellerte avgangar, og det synest vi er lite.
Samtidig er han klar på at det er uheldig kvar gong bilistar blir tvinga til å vente på ferjer som ikkje går som dei skal.
– Det er heilt klart uheldig for våre kundar at ferja ikkje går, og at det får konsekvensar, det forstår vi.
– Men vi gjer så godt vi kan for at dette ikkje skal skje, seier Bergheim til NRK.no.
- LES OGSÅ:
- LES OGSÅ:
– Stabiliteten har vore bra
Han seier ferjene følgjer strenge vedlikehaldsprogram, og at selskapet gjer det dei kan for å halde ruta.
– Vi meiner stabiliteten i sambandet har vore veldig bra, og vi ventar at det skal vere det framover også.