Opna ny direkte flyrute mellom Florø og Stavanger

Næringslivet i Sogn og Fjordane har lenge etterlyst ei slik rute mellom dei to byane. I dag tidleg landa det første flyet.

Fylkesordførar Åshild Kjelsnes seier flyruta er viktig for næringslivet.

– Det er spesielt for olje- og gassnæringane i området ruta er viktig rute. Næringslivet er eksportretta og vi har store forbindelsar sørover mot Stavanger innan petroleum.

Slepp mellomlanding

Mange som arbeider i oljenæringa reiser mykje mellom dei to byane, og dei slepp no å mellomlande i Oslo eller Bergen.

Også leiar for Fram Flora, Jan Tore Bø, meiner dette rutetilbodet er viktig.

– Vi har sakna dette rutetilbodet mot Stavanger. Hovudkontora til dei store selskapa er der og mange har etablert seg i Florø. Skal vi kunne få vidare vekst, må vi ha denne direkteruta, seier han.

Trur det skal gå rundt

Den er oppretta som rein kommersiell rute, utan statleg støtte slik dei andre rutene på kortbaneflyplassane våre har. Direktøren i danske DAT, Jesper Rungholm, var med flyturen til Florø i dag. Han trur ruta skal bere seg økonomisk.

– Vi trur det er nok passasjerar frå Stavanger til Florø og tilbake. Vi satsar mot oljenæringa og håper mange vil nytte seg av tilbodet. Har vi 20 personar om bord per flyging, er vi nøgde.