– Eg føler me er litt ferdige med det å røykje i det offentlege rom, seier Stine Holmen.
Ho sit på uteservering i Bergen sentrum og nyt eit glas vin saman med veninna Elisabeth Sinnes.
Ingen av dei røykjer, og begge er einige i at dei føretrekkjer ei røykfri uteservering.
Det er dei ikkje aleine om.
7 av 10 nordmenn meiner at det ikkje burde vera lov å røykje på uteservering, ifølge ei undersøking bestilt av Kreftforeningen.
– Plagsamt
Distriktssjef Geir Vangnes i Kreftforeningen seier at fleire ynskjer røykfrie område.
– Folk synest det er plagsamt å gå ut for å ete middag og så sit det nokon ved nabobordet og røykjer.
Då forslaget om å forby røyking på serveringsstadar inne og røykjelova vart eit faktum i 2004, var det mange som protesterte.
Men talet på røykjande har gradvis minka dei siste tiåra.
I 2004 røykte kvar fjerde nordmann fast. No er det berre 9 prosent av befolkninga mellom 16 og 74 år som tek seg ein røyk dagleg, viser tal frå helsedirektoratet.
– Det aller viktigaste med arbeidet kring røyking er å hindre at born og unge startar med det, seier Vangsnes.
DISTRIKTSSJEF: Geir Vangsnes seier Kreftforeningen ynskjer røykfrie område.
Foto: Leif Rune Løland / NRKForbod i private bilar
Tysdag denne veka la Helse- og omsorgsdepartementet fram eit forslag på korleis røykjelova kan utvidast.
Dei foreslår blant anna å forby røyking i private køyretøy der barn under 18 år er til stades.
I tillegg vil dei gjere det ulovleg å røykje på leikeplassar eller uteområde meint for idrettsutøving.
Eit forbod mot røyking på uteserveringsstadar er ikkje eit av regjeringa sine lovforslag. Heller ikkje konsertområde eller festivalar.
– Eg er opptatt av at når ein skal stramme inn i lova, må det skje gradvis. I denne omgang har vi konsentrert oss mest om område kor særleg born ferdast, fortel statssekretær Maria Jahrmann Bjerke i Helse- og omsorgsdepartementet.
KONSERTRØYK: Undersøkinga viser også at 71 prosent ynskjer røykjeforbod på utandørsarrangement som konsertar.
Foto: Kyrre Lien / SCANPIXSvenske tilstandar
Sverige gjorde det forbode å røykje ved ei rekke plassar utandørs, blant anna på uteservering i 2019.
Målet var å bli eit røykfritt land innan 2025.
Der trur ikkje Vangsnes at Noreg er, heilt enda.
– Vi foreslår ikkje at røyking skal bli forbode. Vi ynskjer at det skal vera tydelege arenaer som er røykfrie, seier han.
Bedrifter kan likevel velje å sette opp «røyking forbode»-skilt om dei ynskjer eit røykfritt område.
PÅ UTESERVERING: Harald Maalad og Andreas og Anne Lamberg Opsalh er ueinige om røykeforbod er naudsynt.
Foto: Synne SørenesDet meiner Anne Lamberg Opsahl er ein god idé.
– Det lukter jo veldig sjølv om det er ute. Ein pustar det jo inn, fortel ho.
Ho sit også på uteservering i Bergen saman med Harald Maalad og Andreas Lamberg Opsalh som ikkje er einige i at røyking på utestadar burde bli forboden.
– Eg syns det er nok som er ulovleg. Det er berre koseleg og litt retro med sånn røyklukt, seier Maaland.