Notabene har i dag butikkar i kjøpesentra i Måløy, Stryn og Sogndal.
I alt har Notabene 139 butikkar spreidd over heile landet med kring 1000 tilsette. Her i fylket kan konkursen råke eit titals tilsette.
Stort underskot
No har kjeda gått konkurs etter at banken har sagt opp finansavtalane til kjeda. Trass ei omsetnad på 660 millionar i 2011, kom Notabene ut med 15 millionar i minus.
– Dei tilsette, leiinga og eigarane av Notabene har gjort ein stor innsats dei siste åra for å betre lønsemda i bedrifta, men ein tøff marknad har ført til svekka omsetnad og resultat, seier styreleiar i Notabene, Christian Melby, til e24.no.
Vil ikkje kommentere
NRK har vore i kontakt med dei tre Notabene-butikkane i Sogn og Fjordane i dag, men ingen av dei ønskjer å seie noko om den dramatiske situasjonen som har oppstått.
– Vi har fått beskjed om å ikkje seie noko, er omkvedet, og butikkane syner til dagleg leiar for kjeda, Rune Nikolaisen.
– Krevjande marknad
– Det er dessverre ikkje mykje eg kan seie utover at det blir jobba med ei løysing. Butikkane er opne som vanleg i dag, seier Nicolaisen til NRK.
Notabene er ein av landets største bokhandlarkjeder og vart etablert så tidleg som i 1985.
– Dei siste åra har det vore ein krevjande marknad, seier Nicolaisen.