Mista 800 liter såpe frå lastebil

– Vi fekk klokka 11.16 melding om at ein lastebil hadde mista lasta si i krysset på riksveg 5 og Brandsøyvegen, opplyser operasjonsleiar ved Sogn og Fjordane politidistrikt, Hans Petter Harlem.

Det var ein del trafikk i området då ulykka skjedde, men til alt hell var det ingen som vart skadde.

– Politi og brannvesen er på staden, og det er framkommeleg fordi vi har manuell dirigering på staden, seier Harlem.

• LES OGSÅ: Her flyttar eitt tonn usikra last på seg når traktoren bremsar
• LES OGSÅ: Seks stroppar sikra 23 tonn stål

Ikkje fare for eksplosjon

– Vi har fått opplyst at det som har ramla av lastebilen, er ein type såpe. Det skal vere snakk om lag 800 liter. Det skal ikkje vere brann- eller eksplosjonsfare, eller anna helsefare knytt til uhellet, seier Harlem.

Brannvesenet tek seg av opprydding på staden.

– Så får politiet ta hand om det som går på sikring av last, seier Harlem.

• LES OGSÅ: – Uforsvarleg og svært farleg
• LES OGSÅ: Tatt med 17 tonn usikret last

Var fleire vitne

Det skal ha vore bilistar som såg kva som hende då lasta losna frå lastebilen.

– Det var vitne, og det var folk som kom til i same tidsrom som dette hende, seier Harlem.

Han understrekar at det til alt hell ikkje var nokon som vart trefte då såpedunken segla av lasteplanet.

– Nei, heldigvis ikkje, seier Harlem.

Det er førebels uklart kva som er årsaka til at lasta fall av traileren. Politiet er i gang med å undersøkje om lasta var forsvarleg sikra.