Ny avtale sikrar avtalen mellom Malakoff og kommunen

– Bidraga frå Eid kommune betyr enormt mykje, seier Malakoff-sjef, Arnt Ivar Naustdal.

Det er allereie meir enn 700 dugnadspersonar som arbeider gratis for festivalen, og no ynskjer Malakoff eit tettare samarbeid med Eid kommune.

• LES OGSÅ: Difor lukkast Malakoff

Samarbeidsavtala går ut på at kommunen stiller med folk og maskiner til festivalen. I tillegg får festivalen hjelp til oppgåver som rigging, rørleggaroppgåver, rydding, og brannvern.

Bidreg ikkje med pengar

I år søkjer ikkje Malakoff Rockfestival om pengestøtte frå Eid kommune. Det ligg likevel store verdiar i samarbeidsavtala dei no har underskrive.

– Desse tenestene som Eid kommune no vil støtte festivalen er gull verdt for festivalen. Dette er er strålande, seier festivalsjefen nøgd.

Stolt vertskap

Malakoff Rockfestival har vore arrangert sidan 2003 og er blitt ein av landets største rockefestivalar. Publikumstalet har utvikla seg frå 650 besøkjande i 2003, til 17 000 i 2012. Ordførar i Eid, Alfred Bjørlo seier han er stolt over å vere vertskap for det han kalar landets beste festival.

– Malakoff har blitt den kanskje viktigaste møtestaden for folk som bur i Eid og regionen rundt og for utflyttarar, studentar og andre med tilknyting til staden og regionen. Vi er glade for at vi også frå kommunen si side kan hjelpe Malakoff med ein del av det festivalen har trong for, seier ordføraren.

• LES OGSÅ: Rockefestival startar skule
• LES OGSÅ: Kan bli «Årets Festival» 2012

Festivalsjefen seier at Malakoff Rockfestival ønskjer å få ut eit viktig bodskap gjennom samarbeidsavtala, nemleg at det er mogeleg å bli verande i regionen, og ikkje minst flytte tilbake.

I tillegg til sjølve festivalen er Malakoff synleg på Eid på fleire måtar. Rockeskule, øvingslokale, og ein eigen arrangørskule for dei som har lysst å lære seg å lage eigne festivalar.

– Malakoff gir utruleg mykje tilbake til Eidasamfunnet, seier ordførar Bjørlo.