– Mannskapet har flytta på last om bord, og på stigande sjø kom det av grunn, seier vaktleiar Silje Berger i Kystverket.
Tidlegare i dag måtte bergingsarbeidet avbrytast etter at ein av sleparane rauk.
Skipet er lasta med sand og steinmateriale, og etter å flytta noko av lasta lenger bak i skipet kom båten altså av grunn. Den vart slept til Florø der dei var framme ved 22.30-tida tysdag kveld.
Det er førebels ikkje klart kor store skadar skipet har fått i samanstøyten.
– Det vi veit er at det har vore vassinntrenging i ein ballasttank forut. Lasteskipet vert no slept til Florø for nærare undersøkingar og Sjøfartsdirektoratet vil følge opp saka, seier Berger.
Sju personar i båten
Det var i natt Redningsselskapet rykte ut etter at det Stavanger-registrerte lasteskipet «Falkbris» gjekk på grunn.
Hendinga skjedde ved Olaskjæret i Bremanger, mellom Florø og Måløy i Vestland, om lag 23.30.
Det var sju personar om bord. Ingen av dei vart skadde i hendinga.
Skipet gjekk på grunn ved Olaskjæret i Frøysjøen i Bremanger.
Foto: RedningsselskapetKystvakta og redningsskøyta «Bergen Kreds» var på staden for å hjelpe. På grunn av dårleg vêr blei redningsarbeidet utsett til om lag klokka 10.30.
– Dette arbeidet er i gang, sa Markus Plementas, kommunikasjonsrådgjevar i Redningssentralen til NRK klokka 11.00.
Vil ha tilsyn av båten
Hovudredningssentralen blei også varsla om hendinga i natt og sende ei redningsskøyte.
Ingen personar vart skadde då eit lasteskip gjekk på grunn i Frøysjøen i Bremanger seint måndag kveld.
– Alle om bord i båten hadde det greitt og sov difor der i natt. Det var aldri fare for liv og helse, sa redningsleiar Torgeir Espedal til NRK.
«KV Sortland» var på plass. Det same var slepebåtane «Polaris» og «Nordmand Sigma».
– Det blir ein omfattande operasjon, sidan det er ein over 80 meter lang båt, sa Espedal.
«RS Bergen Kreds» var også i nærleiken då slepearbeidet var i gang, i tilfelle det vart lekkasjar eller båten tok til å søkke.
Sjøfartsdirektoratet var orientert om hendinga.
– Frå vår side vil det verte aktuelt med eit tilsyn når skipet har komme til kai. Dessutan er reiarlaget pålagt å levere ein ulukkesrapport til oss innan 72 timar etter hendinga, seier Dag Inge Aarhus, kommunikasjonsdirektør i Sjøfartsdirektoratet.
Bergingsarbeidet av «Falkbris» vart utsett etter at slepebåtane Delfi og Polaris måtte avbryte.
Foto: RedningsselskapetHåpa høgvatnet kunne bli løysinga
Politiet blei varsla om hendinga klokka 00.35 i natt.
– Vi har fått vite at det ikkje er nokon akutt fare, sa operasjonsleiar i Vest politidistrikt Helge Blindheim.
– Håpet er at høgvatnet kan få båten av grunn, la han til. Men først utpå kvelden kom skipet seg altså ut i rom sjø att.