Krev tiltak mot ørnebestand

Bondelaget i fylket krev tiltak for å få bukt med det dei meiner er ein aukande ørnebestand.

Søknadane om erstatning er dobla

Søknadane om erstatning for husdyr som er tekne av ørn, er nær dobla i løpet av eitt år.

I tillegg til ei dobling av drepne sau og lam, er også to hundar tekne av ørn dei siste vekene.

LES OG: Dachs drepen av ørn

LES OG: Ørnar tok to hundar på tre dagar

Bondelaget er svært uroa over situasjonen.

- Vi får inn stadig fleire meldingar frå folk som held sau i fylket, om at bestanden av kongeørn er aukande, seier nestleiar i Sogn og Fjordane Bondelag, Jon Nummedal.

- Ørn vert observert meir enn før

Han fortel at erstatningsoppgjeret som no er ferdig tyder på ei dobling i erstatningsutbetaling for tap av sau og lam som er forårsaka av ørn.

- Folk melder om at ørn vert sett oftare, og det vert observert stadig fleire ørner i lag, seier Nummedal.

Fylkesmannen har sagt at dei vil vurdere om ørnebestanden i fylket skal regulerast etter ei teljing av kongeørn i vår.

Krev rask handling frå fylkesmannen

Nummedal krev at ei slik kartlegging vert gjort.

- Det er vanskeleg å dokumentere at det er ørn som har forårsaka tapet av sau og lam. Har ein ikkje god nok dokumentasjon er det vanskeleg å få erstatning, seier Nummedal.

Dermed må bestanden av ørn ned for å hindre ytterlegare tap meiner han.

Bondelaget i fylket håpar fylkesmannen handlar raskt.

- Vi håpar at fylkesmannen set i gang ei teljing så raskt det er praktisk mogleg, avsluttar Nummedal.

LES OG: Berga hund etter dramatisk aksjon