Mennene, som politiet skildrar som unge, blir framstilt for ny fengsling i løpet av neste veke.
Dei tre er sikta for valdtekt av ei ung kvinne siste helga i januar. Mennene vart etter pågripinga fengsla i fire veker med brev- og besøksforbod.
To av mennene blir framstilte måndag, medan den siste blir framstilt for fengsling torsdag.
Askel Rødland er straffesaksansvarleg for politiet i Sogn og Fjordane.
Foto: Brit Jorunn Svanes / NRKDet er uvisst kor lang fengslingsperiode politiet vil be om.
– Politiet er av den oppfatning av at vi har behov for å be om ytterlegare fengsling fordi det står att etterforskingsoppgåver som er sentrale for bevissituasjonen, seier straffesaksansvarleg for politiet i Sogn og Fjordane, Askel Rødland.
Motset seg fengsling
Advokat Ivar Eivind Hauge forsvarer ein av dei to som blir framstilte for fengsling.
– Min klient motset seg at det er grunnlag for vidare fengsling, seier han.
Det same gjer Paul-Inge Angelshaug, som forsvarer mannen som skal framstillast torsdag.
– Vi møter i retten, men vil hevde at det ikkje er grunnlag for vidare fengsling.
Begge mennene har forklart seg for politiet, men forsvararane vil ikkje gå inn på kva som har kome fram i avhøyr. Førebels vil dei heller ikkje kommentere spørsmålet om straffeskuld.
– Min klient erkjenner ikkje straffskuld, og motset seg forlenga varetektsfengsling, seier Ivar Blikra, forsvararen til den siste sikta.
Klausulerte dokument
Dokumenta i saka er klausulerte.
I politiet har Rødland vore, og framleis er, sparsam med opplysningar om saka.
Heller ikkje han vil gå inn på kva som har kome fram i avhøyr og gjennom etterforskinga.
– Eg har ikkje lyst til å gå inn på noko knytt til det som kjem fram i forklaringa til dei sikta, seier han.
– Kva relasjon er det mellom dei fire involverte?
– Det er del av etterforskinga vi gjer. Av omsyn til etterforskinga og objektiviteten i den, ynskjer vi ikkje å kommentere relasjonar mellom dei ulike partane.
Politiet har gjort krimtekniske undersøkingar og undersøkjer digitale einingar. Dei har også gjennomført eit stort tal vitneavhøyr.
– Framover vil vi halde fram med å hente inn bevis og gå gjennom spora som vi har henta inn, seier Rødland.