Kostar 30 millionar å fiksa fotballbane etter flaum
Den nye fotballbanen i Vaksdal blir langt dyrare enn venta. Det skriv avisa Hordaland.
Kommunen har vore utan bane sidan den førre kollapsa på grunn av eit søkkjehol i januar 2022.
Bana ligg over fleire røyr som fører vatn frå fjellet ned i fjorden. Det er desse som no må skiftast ut og som fører til dei høge kostnadane.
– Me forventa ein prislapp på kring 10 millionar, men no ser det ut til å bli over 30 millionar kroner for å få den nye bana på plass, seier varaordførar Kjartan Haugsnes (SV).
Til avisa Hordaland seier Haugsnes at kostnadane er på lik linje med å bygga to nye barnehagar.
Det er kommunen sjølv som må stå for utgiftene.
– Det er dyrt, men me har ikkje noko val. Røyra må skiftast ut. Det er også viktig med eit ordentleg idrettstilbod i kommunen, seier varaordføraren.
Bana er venta å vera klar til hausten.
