– Eg har reist hit fordi et synest dette prosjektet handlar om veldig, veldig mange positive ting. Dette er eit prosjekt som vi treng fleire av i landet vårt. Vi har relisert eit prosjekt som eg trur alle er samde om er bra, sa Riis-Johansen då han opna kraftverket.
Artikkelen held fram.
– Eit stort og viktig kraftverk
Kjøsnesfjorden kraftverk AS som fekk klarsignal frå Stortinget i mars 2004, er eit av dei største nye vasskraftverka som er bygd i Norge dei siste åra. At kraftverket no er komen i drift, er viktig, meiner statsråden.
– 247 GWh er så mykje kraft at det gjer ein forskjell i høve til straumproduksjonen i dette området. Det er eit stort og viktig kraftverk. Eg vil gratulere alle dykk som har bidrege til å realisere dette prosjektet. Gratulerer med dagen!, sa Riis-Johansen i si helsing.
Sunnfjord Energi og BKK
Blant dei som er glade for å vere i mål, er ingeniør Kjell Johnny Kvamme i Sunnfjord Energi.
– Det er kjekt å endeleg vere i gang, seier Kvamme som i NRK Sogn og Fjordane si føremiddagssending viste reporter Birger Meland rundt i kraftverket på direkten.
Kraftverket, som er eigd av Sunnfjord Energi (73 prosent), BKK (20) prosent og grunneigarar (sju prosent), har vore i drift ei tid, men i samband med den offisielle opninga er produksjonen stoppa.
– No er det 24 timar sidan vi stengde av, men turbinen er framleis varm, forklarte ingeniøren då han tok NRK med inn i det aller heilagste.
Har tatt fire år å byggje
Ved full produksjon vil anlegget ha ein årleg produksjon på 247 GWh, med ein installert effekt på 84 MW. Det tilsvarer straumforbruket til 12.350 husstandar.
Bygginga av kraftverket har tatt fire år og har ei kostnadsramme på ca 560 millionar kroner (2000-kalkyle). Totalt har anlegget kosta ca 900 millionar kroner.
Kraftverket utnyttar eit fall på 760 meter frå reguleringsmagasinet Trollavatnet til Jølstravatnet. Anlegget omfattar av kraftstasjon i fjell, 20 km tunnelar, 760 meter sjakter, to fyllingsdammar og 11 bekkjeinntak.
Slik blir opninga markert:
10.30 - 12.00: Biletshow på Lunde turiststasjon frå byggjearbeidet og landskapet i byggjeområdet. Hornmusikk ved Arvid Anthun og Trude Skarvatun.
10.30 - 11.30: Omvising i kraftverket for gjestar.
11.30 - 12.00: Statsråden og gjester får omvising i kraftstasjonen.
12.00: Samlingssignal med fanfare.
12.20: Olje- og energiministeren talar og opnar formelt kraftverket. Ein film viser korleis oppstarten i kraftstasjonen føregår.
12.55: Riis-Johansen reiser.
13.00 - 14.15: Servering av kortreist mat og drikke på Lunde turiststasjon.
14.15: Helsingar
14.25: Musikk ved Annbjørg Lien og Bjørn Ole Rasch.
14.30: Kaffiservering.
14.30 - 16.30: Gruppevis omvising i kraftstasjonen.
15.00: Fottur opp Lundeskaret til Trollevatnet med kjentmann.
Kraftverket held også open dag 10. oktober.