Ann Kristin Aafedt Flatland var i ein klasse for seg under sesongopninga på 7,5 kilometer sprint på Beitostølen:
Trass tre bom på standplass banka ho nærmaste konkurrent med 25,9 sekund.
- Det vart litt mange bom, men elles var løpet heilt greitt, seier Flatland til NRK Sogn og Fjordane.
Middels innsats i skyting - rå på ski
Flatland fekk ein bom på liggjande, og meinte det var ei grei skyting. Ho var meir misnøgd med det ho gjorde på ståande - der det vart to bom.
Men det spelte lita rolle, så lenge ho var så suveren i sporet.
- Eg har nok aldri vore så sterk fysisk nokon gong før. Spesielt teknisk i padling er eg betre enn før. Så eg har nok gjort mykje rett i sommar, meiner Vik-løparen.
(Artikkelen held fram under biletet)
- Ikkje godt nok til verdscupen
Flatland var stor favoritt før rennet, ettersom Tora Berger melde forfall i morgontimane.
Desto større var gleda over å innfri.
- Held dette til å hevde seg i verdscupen?
- Nei, det var nok for mange bom til det. Men løpstida trur eg hadde vore sterk også i verdscupen, seier Flatland.
Polske Weronika Nowakowska Ziemniak og Agnieska Cyl tok dei andre plassane på sigerspallen.