Hovland har full forståing for at det er spekulasjonar kring opphaldet hos englands mestvinnande fotballklubb dei siste 20-åra. Sjølv hevdar han å ha lite kjennskap til opphaldet.
- Eg veit ikkje noko meir enn det du veit, at eg skal trene nokre dagar og heim att torsdag eller fredag. Eg fekk eit tilbod måndag kveld om å komme bort og trene eit par dagar, og vart samd med Sogndal om at det var greitt, seier 20-åringen til NRK.
Trena i dag
Hovland var onsdag gjennom den første treninga med A-laget. Til Sogndal fotball sine
sa han tysdag kveld at han også skulle gjennom ei rekkje fysiske testar onsdag. Hovland seier det ikkje vart gjennomført testar.- Eg trena med A-laget i dag. Vi var ikkje så mange, berre eit par spelarar som ikkje spelte kamp i går. Men det var godt å kome i gang. Eg skal trene med A-laget også i morgon, så veit eg ikkje kva som skjer vidare, seier Hovland.
- Ikkje uvanleg
Hovland var også før jul på treningsopphald med Manchester United. Ifølgje kjelder som NRK har vore i kontakt med på fotballøya, er det ikkje uvanleg at spelarar blir henta attende på nytt prøvespel. Men det understrekar også United si interesse for ein spelar.
- Kva seier det deg at dei no vil ha deg over på eit nytt, men kortare opphald?
- Det seier meg ikkje så mykje, seier Hovland ordknappt.
- For å trene
Uansett om United skulle ynskje Hovland som den åttande norske spelaren i klubben, tek Hovland det heile med knusande ro.
- Det får vi ta dersom den tid kjem, så det vil eg ikkje bruke tid på å tenke på no. Eg er her for å trene på eit høgare nivå enn det som er heime. Det er det viktigaste for meg. Men, det er ein fantastisk sjanse. Dei spelar i Premier League, og du får kjenne på nivået.