Sogndal skisenter Hodlekve:
Har ikkje opna anlegget, og er avhengig av meir natursnø for å kunne starte sesongen.
- Vi hadde håpa å kunne opne for lenge sidan, men treng meir skikkeleg snø. Men vi har køyrt opp langrennsløypene, seier driftssjef Knut Krogstad.
Sunnfjord skisenter:
Har opna for sesongen. Har fine forhold, og det var søndag ein god del folk i bakken.
- Vi har ikkje opna øvste delen av bakken, då det er litt lite snø. Men vi har fine forhold, og skal ha ope i romjula, seier kioskvakt Mindor Sellevold.
Breimsbygda skisenter:
Har ikkje opna anlegget. Treng 10 centimeter snø før sesongen kan starte.
- Det kan komme fort, men det er vanskeleg å seie meir om når vi kan opne. Det kan skje allereie i morgon - tidlegast. Då blir det i tilfelle berre den nye heisen og tautrekket, for det er nok for lite snø til å kunne opne resten enno, seier driftsleiar Kåre Solheim.
Stryn skisenter:
Opna 2. juledag for sesongen. Førebels er berre den nedste tredjedelen av bakken og barnetrekket ope.
- Vi har produsert snø, og har fått litt styresnø i tillegg. Men meldingane er gode, og vi håpar på meir snø også oppover i anlegget, seier dagleg leiar Svein Egenberg.
Harpefossen skisenter:
Har to skitrekk opne, men også her berre nedst i anlegget. Dosar no ut snøen, og planen er å opne fjellheisen halvveges opp på måndag. Har fine langrennsforhold.
- Det er veldig fine forhold nede i bakken, og det er bra med folk. Eg reknar med at anlegget blir ope framover no, men vi må ha meir natursnø for komme heilt opp, seier styreleiar Stein Bjørhovde.
Jølster skisenter:
Opnar anlegget for sesongen på måndag. I første omgang opnar Kvamsbakken frå mellomavstigning på 650 m.o.h. og ned på Kvamsstøylen på 440 m.o.h. Totalt vil skisenteret då ha 1000 meter open trasé, hovudsakleg med kunstsnø.
- Gamlebakken kan bli opna tidleg på nyåret, melder skisenteret på nettstaden sin.
Sogn skisenter:
Har drift i barneanlegget og delar av hovudheisen. Skal ha ope kvar dag utanom nyttårsaftan framover.
- Vi har opna om lag 1000 meter av bakken, og har ikkje snø lenger oppe. Men det snør tett, så det ser bra ut, seier driftsansvarleg Geir Øygard.
