Helse Førde snakkar med naboane

Informasjonssjef i Helse Førde, Arne Eithun, stadfestar at det er kontakt mellom

Helseføretaka.

Vil ikkje røpe noko

- Det kan eg seie fint lite om, seier Eithun.

Helse Førde og Helse Sunnmøre diskuterer no om dei skal samarbeide meir på tvers av fylkesgrensene.

Og fleire aviser spekulerer i at akuttberedskap og fødetilbod i Nordfjord kan bli lagt til Volda sjukehus.

Samarbeid?

Sunnmørsposten og Fjordabladet spekulerer i at eit samarbeid mellom Helseføretaka over regiongrensene kan føre til at akuttberedskapen og fødetilbodet for Søre Sunnmøre og Nordfjord blir lagt til Volda, medan rusomsorga og psykiatrien blir lagt til Eid.

Uroleg over samtalane

- Det er veldig urovekkjande, det skal det ikkje vere tvil om, seier ordførar i Eid Sonja Edvardsen.

Ho meiner det ikkje er mogleg å fjerne fleire funksjonar ved lokalsjukehuset.

- Det er tryggleiksbasen her, og slik eg har oppfatta det slik eit desentralisert sjukehustilbod skal vere.

Klart når strategiplanen ligg føre

Sjølv om Eithun ikkje vil seie noko om innhaldet i samtalane dei har med Helse Sunnmøre, fortel han at det er i samband med strategiarbeidet som helseføretaket arbeider med at dei er dialog med dei.

- Det er naturleg at vi har dialog og kontakt på tvers av grensene fordi vi arbeider med strategiarbeidet. Men kva som kjem ut av dette vil ikkje vere klart før strategiarbeidet er ferdig, seier han.