- Vi vil utvide og vil byggje eit nytt og moderne internat. Dermed kan vi forsterke Sogndal som ein stad der ein kan halde på med aktivitetar heile året, seier rektor May-Evy Bakken til Sogn Avis.
Auke i overnattingane
I dag driv Sogndal Folkehøgskule vandrarheim om sommaren, og inntektene derifrå er ein føresetnad for at skulen overlever. I fjor auka talet på overnattingar med 30 prosent.
- Kan vi ta imot turistar heile året vil det gje grunnlag for fleire bedrifter i området, seier Bakken, som ser for seg at det blir satsa kraftig på friluftsaktivitetar.
Krev auka areal
Ho har sendt eit notat til Sogndal kommune om planane, som krev at skulen må få disponere eit større areal enn i dag. Dagens internatbygg er over 40 år gamle, og uansett er det trong for ei modernisering av overnattingstilbodet på skulen.