Heiar pappa fram på heimebane

- Klart det er stas at familien heiar på meg ute i løypa, seier Odd-Bjørn Hjelmeset.

Han gjekk fredag inn til ein anonym 69. plass på 15 kilometer klassisk i sesongopninga, men var eit einaste stort glis etter målpassering.

- Plasseringa bryr eg meg ikkje om. No fekk eg meg ei god økt - og det er viktig med tanke på søndagen, seier Hjelmeset.

(Artikkelen held fram under biletet)

Vakna to timar før rennet

For det er søndag klassiskeksperten skal vise landslagsleiinga at han er verdt å satse på også denne sesongen.

Då er det 15 kilometer klassisk på programmet, og då stiller han nok betre førebudd også...

- Det var like greitt at dette rennet gjekk så seint som klokka eitt. Eg forsov meg, og vakna ikkje før elleve, humrar Hjelmeset.

Ute i sporet hadde han familien ringside, og kvar runde heia Elisabeth og dei tre ungane på langrennshåpet frå Gloppen.

For på Beitostølen er familien Hjelmeset ofte - og her legg far sjølv mykje av grunnlaget for satsinga fram mot VM i Holmenkollen.

- For meg er dette heimebane. Det er heilt topp å gå her, seier Hjelmeset.