Politiet prioriterer ikkje teneste på sjøen - har ingen båt

Den finst i dag ingen politibåt mellom Trondheim og Bergen. Politibåtane i Florø og Molde er seld fordi det må sparast pengar.

– Beredskapsordning har vi, men noko kontrollteneste vil det ikkje vere enno, seier politimeister Johan Brekke i Sogn og Fjordane politidistrikt til Firda.

Varsla fleire kontrollar

Eit stort fleirtal av det norske folk meiner politiet ikkje er synlege nok på sjøen. Det syner nedslåande tal i ei ny undersøking som vart presentert i oktober i fjor. I fjor omkom 31 menneske på sjøen, og over halvparten av dei spurde meiner ulykker kunne vore unngått dersom politiet hadde gjort meir.

• LES OGSÅ: Saknar synleg politi på sjøen

Politiet har varsla fleire kontrollar på sjøen etter at det vart krav om båtførarbevis, men det blir vanskeleg sidan dei ikkje har nokon båt å bruke.

– Stikkprøver vil vi ha, men det er ikkje høgt prioritert, seier lensmann og driftsleiar Jan Egil Tvinde for politiet i Sunnfjord til Firda.

Høyr radiosak frå oktober 2010:

Lagar handlingsplan

Politiet sa til NRK i oktober at det var planar om å kjøpe ein ny og mindre båt. Førebels er ingen ny båt på plassn.

Det er sett ned ei handlingsgruppe som skal sjå på politiet si sjøteneste i fylket og komme med ei tilråding til politimeisteren innan 1. juni.

– Før handlingsplanen er på bordet har eg ikkje noko svar på korleis dette bil gå føre seg. Men det blir nok uaktuelt med fulltidsbemanning slik det er i Bergen no, det har vi ikkje resursar til, seier Brekke til Firda.

Eit dokument som NRK.no har fått tilgang til viser at politibåten i Florø vart seld for litt over ein million kroner til Statens naturoppsyn. Skjer det noko og politiet må rykkje ut til sjøs må dei no leige inn båt.