– Nokon vil kanskje kalle det galskap, men det vil ikkje eg, seier den ihuga fjellklatraren frå Førde.
I haust klatra Håvard Sandal Høyvik sjefsfjellet El Capitan i Yosemite i USA – ein over 900 meter høg, vertikal fjellvegg. Når han no står på trappene til ein klatretur til Spania, er det for å trene seg opp til ein ny tur opp El Capitan.
– Ein skal ikkje vere redd for høgder, men ein blir fort vand med å ha fleire hundre meter under seg, seier han sjølv.
– Veit kva vi gjer
For så lenge han kjenner seg trygg på tauet han heng i, då går det greitt. Med seg på turen opp El Capitan hadde han og turkameraten med seg ein stram duk på under tre kvadratmeter. Der kunne dei sove, slappe av og gjere det naudsynte.
Turen opp den stupbratte fjellveggen i Yosemite tok seks dagar – dobbelt så mange dagar som vanleg, for å kunne nyte klatringa mest mogleg.
– Vi ville ikkje gjere så mykje teknisk klatring, men i staden friklatre meir, fortel han.
Det betyr at dei ikkje heng fast i utstyret, berre etter hender og føter. Men, dei har sikring.
– Det er like sikkert. Det er ikkje femti-femti om vi kjem oss ned i live eller ikkje. Vi veit kva vi gjer og har marginane på vår side.
Tok ein misunnt rekord
Tjueåringen har sansen for det som er litt ekstra spennande. Medan han var heime for å jobbe seg opp pengar til ein ny klatretur i jula, knabba han til seg ein rekord opp majestetiske Storehesten i Gaular.
– Eg søker meg mot det som får det til å krible litt ekstra i magen. Det går ein veg mot at det berre skal bli brattare og brattare. At ingen før hadde klatra Storehesten på vinterstid gjorde det ekstra stas, seier han.