Trur på avklaring i løpet av april

Berre detaljar står att før avtalen kan signerast. Det stadfester Halvor Flatland i Innovasjon Norge overfor NRK.

Få veker unna signering

– Ingenting er sikkert, men alt går i retning av ein avtale. Eg vil tru at i løpet av april månad skal vi ha dette klart, seier Flatland.

Det franske selskapet Saint Jean Industries skreiv i vinter ein Intensjonsavtale mellom Høyanger kommune om økonomisk samarbeid for å få felgproduksjonen på fote att. No er franskemmene i sluttingingar med Innovasjon Norge som sit på buet etter konkursen i Fundo Wheels, ikkje minst rettane til det patenterte todelte - såkalla hybridhjulet.

Vanskeleg å få bankane med

– Vi har gått mange rundar med selskapet med tanke på å finne ei løysing. Dette er det einaste selskapet som har komme med konkrete planar om å produsere felgar i Høyanger. No nærmar det seg slutten. Vi er i siste sving og på veg ut på oppløpssida. Vi har nokre finansielle utfordringar framleis som ikkje er heilt på plass, seier Flatland til NRK.

Særleg det finansielle har vore eit utfordring under tingingane.

– Det har vore veldig vanskeleg å få med private bankar på dette. Det står att litt rundt dette, men det skal ikkje vere lenge att før vi har avklaringa og vi vonaleg kan signere avtalen.

Målet: 150 tilsette i 2015

Hovedlinjene i avtalen er alt på plass og inneber at Innovasjon Norge sel rettane, driftsutstyr med meir til det franske selskapet. Sjølve fabrikkbygget og eigedomen vil derimot bli selt til eit lokalt selskap, som igjen leiger ut til franskmennene.

Planen er ein forsiktig oppstart med produksjon av hybridfelgen. Franskmennene ser føre seg å starte med 14 tilsette, for så å auke produksjon og bemanning gradvis. I 2015 er målet 150 tilsette og ein produksjon på 500.000 felgar.

Hybridfelgen vart utvikla og patentert av Fundo, i tett samarbeid med Volvo og Audi. Felgen er både lettare og sterkare enn dei normalt heilstøpte aluminiumsfelgane. Til saman skal eit hjulsett vere fire kilo lettare enn tradisjonelle felgar.