Fire menn berga frå brennande lasteskip

• Sjå Redningsselskapet sin video nederst i saka.

I eit vêr som Hovudredningssentralen skildrar som eit «helvete» blei fire menn berga i natt. Midt i haustormen på Vestlandet mista skipet motorkrafta, dreiv mot land og tok fyr.

Helikopter blei sendt frå redningsbasen i Florø og skip som låg i området kom til havaristen. Eit av skipa er supplyskipet «Havila Subsea».

– Ein får medisinsk tilsyn på «Havila Subsea», tre andre blir sendt med helikopter til Florø, opplyser Ola Vaage ved Hovudredningssentralen for Sør-Noreg.

Frå stoveglaset sitt følgde Ketil Dalsøren, som bur like ved, med på redningsaksjonen.

– Det er vanskeleg å setje ord på det vi såg. Det var mange båtar, helikopter og flammar i lang tid, men no ser det ut til å ha avteke, seier han.

Ved Hovudredningssentralen på Sola rosar Vaage redningsarbeidet.

– Det var ein veldig krevjande redningsaksjon som var utruleg vanskeleg, men den var eit skuleeksempel på kva ein får til når ein står saman, seier Vaage.

Ved 01.50-tida natt til torsdag stod skipet framleis i brann og Kystverket tok over ansvaret for berginga av vraket. Brannen vart sløkka av seg sjølv.

– Vêret var eit helvete der ute, seier Vaage.

Torsdag morgon ligg båten i utbrent i fjæresteinane utanfor Askvoll medan ein slepebåt passar på at den ikkje skal drive av garde.