- Eg er veldig nøgd, seier Inger Anne Frøysedal.
Ho har nett teke imot sitt andre NM-gull i tresteg på to år, og smiler frå øyre til øyre til alle gratulantane.
- LES OGSÅ:
Vann med nesten ein meter
Med eit bestesprang på 13,41 meter var strynejenta heilt suveren i det sure vêret på Sandnes stadion. Sølvet gjekk til til Mia Haave med resultatet 12,46 meter.
- Eg gjorde ein grei serie, sjølv om eg ikkje akkurat er supermotivert sånn heilt mot slutten av sesongen, seier Tjalve-utøvaren.
- Det blir heller ikkje dei beste resultatet i kjølig vêr, konstaterer ho.
Satsar tøft på skule og idrett
Frøysedal toppa med gullet ein strålande sesong, der ho mellom anna kvalifiserte seg og deltok i EM i Barcelona.
No satsar ho knallhardt vidare på idretten ved sidan av det tøffe veterinærstudiet i Oslo.
- Eg får ikkje tid til så velig mykje anna enn trening og skule. Men det er verdt det, seier Frøysedal.
(Artikkelen held fram under biletet)
Strømmen Kjerpeset tok bronse
Den utflytte nordfjordingen gav Sogn og Fjordane ein pangstart på meisterskapen i Sandnes. Men det var også andre gode resultat.
Mellom anna tok Øyvind Strømmen Kjerpeset bronse på 400 meter hekk. Med tida 53,11 var han berre eit tidel bak sølvet - men nesten eit sekund bak vinnaren.
- Det var eit skikkeleg dårleg løp under veldig vanskelege forhold. Eg visste aldri om det var med- eller motvind ved hekkepasseringane, og difor vart det litt nølande og rotete, seier Florø-løparen.
Skal springe meir i NM
Han var likevel godt nøgd med innsatsen. For tida er god under dei rådande forholda. Tidlegare i år har han prestert 52,74 under perfekte forhold i Tyskland.
No satsar han på eit godt resultat også på 200 meter, før Florø søndag stiller med eit spennande lag på stafettane,
- LES OGSÅ:
17-åring med sølv i senior-NM
På 3000 meter kappgang sytte Kristiane Rygg frå Gloppen for at klubben kom i gang med NM med ein sølvmedalje.
Rett nok var det berre to deltakarar i kvinneklassen - men sølv er sølv.
- Sølvet var vel som venta, ler 17-åringen.
Ho sleit med både dårleg rygg og smerter i magen, og var nøgd med å ha teke medalje i senior-NM. Laurdag skal ho springe 400 meter i Sandnes.
(Artikkelen held fram under biletet)
Slik gjekk det med resten...
I kule for herrar vart det fjerde- og femteplass på Idar og Yngve Grøneng Havn frå Florø. Det var nøyaktig 50 centimeter som skilde brørne på resultatlista - Idar var lengst med 15,87 meter.
I sleggje enda Steinar Kleppe på fjerdeplass med eit lengstekast på 56,33 meter. Her vann Eivind Henriksen frå Tjalve med sterke 70,57 meter.
Gloppens Merete Helgheim enda på femte- og sisteplass på 10.000 meter, men sprang likevel inn til ny personleg rekord med 37.23,59.
Kim Nes Leirvik frå Florø vart ståande utan resultat i stavsprang med tre underkjente forsøk.
Friidretts-NM i Sandnes held fram med fleire medaljesjansar til Sogn og Fjordane laurdag og søndag.