– Eg visste jo at det er få mannlege helsesjukepleiarar, men eg var ikkje klar over at vi er dei første her.
For første gong i Høgskulen på Vestlandet si historie, har det kome inn mannlege studentar på helsesjukepleie.
Ivar Bjørkelund er ein av dei tre som skal starte til hausten.
– Eg tenkjer at det er på tide, og så er det litt synd at det er få som har søkt før, seier Bjørkelund.
Stor konkurranse
Instituttleiar for Institutt for helse- og omsorgsvitskap, Georg Førland, er nøgd med det han ser.
– Det er jo svært gledeleg at det er mannlege søkjarar som har kome inn. Det er jo svært ønskjeleg frå vår side, seier Førland.
Han meiner at det historisk sett har vore høge søkjartal på studiet og at det er samansette grunnar til at ikkje fleire menn kjem inn på studiet.
– Det eine kan jo vere fordi tittelen tidlegare var helsesøster, noko som kan ha blitt sett på som litt ekskluderande, fortel instituttleiaren.
I 2019 vart tittelen endra til å vere kjønnsnøytral.
– Og så er det eit studium det er vanskeleg å kome inn på, med stor konkurranse om plassane.
På landsbasis viser tal frå Statistisk sentralbyrå at det i 2021 var 36 mannlege helsesjukepleiarar i landet, samanlikna med 7162 kvinner.
Av mennene var 28 i arbeid, samanlikna med 4990 kvinner.
Ikkje overraskande
Daniel Kendrick er utdanna helsesjukepleiar, og er i dag avdelingsleiar for skulehelsetenesta i Bydel Alna i Oslo.
Han er samd i at namnebyte kan ha verka positivt for å få fleire menn til å søkje seg til studiet.
Samstundes trur han at statusen til yrket, kan påverke kven som søkjar.
– Eg trur det er viktig å løfte heile feltet, og få fram at det er spesialisert sjukepleie vi driv med som helsesjukepleiarar, seier han.
Kendrick fortel at då han sjølv var sjukepleiarstudent, blei han fleire gonger spurd om han skulle vidareutdanne seg til intensivsjukepleiar eller leiar.
– Eg stussa på at veldig mange spurde om det. Anestesi og intensiv blir kanskje sett på som spesialiseringar med høgare status enn helsesjukepleie.
Spennande jobb
– Det er veldig mange menn som kunne ha gjort ein god jobb som helsesjukepleiar, viss dei berre hadde tenkt seg om, seier Bjørkelund.
Han tenker at det å jobbe med barn og unge er spennande og viktig.
Bjørkelund meiner det er bra for studiemiljøet å få menn inn på studiet. Det er Kendrick samd i.
– Det er jo klart at debatten, og måten vi handterer tema på blir litt fattigare når det er lite mangfald, meiner Kendrick.
Kendrick seier at studiet inneber mykje erfaringsutveksling som han trur blir styrkt av ulike perspektiv.
Med aukande etterspurnad etter helsearbeidarar i arbeidsmarknaden, meiner instituttleiar Førland at høgskulen må bli betre på å løfte fram fleire gode rollemodellar for å auke rekrutteringa.
– Vi må vere meir offensive i rekrutteringa av mannlege studentar innanfor helse- og omsorgstenester generelt, seier instituttleiaren.