Førde-trio sentrale for «Nye Norge»

Etter år med økonomiske vanskar, er Norges volleyballforbund i ferd med å byggje opp eit nytt landslag og yngre landslag for framtida.

Trioen Mathias Loftesnes, Lars Fredrik Tvinde og Jonas Kvalen ser ut til å bli sentrale for «Nye Norge» når VM-kvalifiseringa tek til like over nyttår.

– Dette kan bli spennande. Får vi trena mykje saman og spelt mange kampar mot god motstand, så trur eg alt kan skje. Det kjem sjølvsagt an på trekninga, men vi skal bli vanskelege å slå, trur Loftesnes.

– Lærerikt

Landslaget starta treningssamlinga i Polen med å slå tre klubblag. Før spelarane kjem heim onsdag går turen også innom Slovakia for å møte eit av topplaga der.

Loftesnes er førstereisgut med seniorlandslaget.

• LES OGSÅ: Numme takkar nei til landslaget

– Det er gøy å reise utanlands og møte utanlandske lag. Det er veldig spesielt, men også lærerikt å spele på høgt nivå. Det er då ein blir god, seier kantspelaren frå Førde.

Mykje speletid

Med seg på turen har han også Førde-libero Tvinde og oppleggjar Kvalen frå klubblaget.

– Tvinde er einaste libero, og får spele heile tida. Vi har to leggjarar med oss, Kåre Morken frå Nyborg og Kvalen. Dei byter på å spele, fortel Loftesnes og legg til at det er eit ungt landslag som er på tur.

– Ingen er eldre enn 24 år, så vi har eit ungt lag med stort potensial, og som allereie held høgt nivå, seier han.

Godt med samling

– Det er kjekt å sjå at det blir satsa på landslaget. Det har ikkje vore satsa skikkeleg på dei siste ti åra, held Loftesnes fram.

Til treningssamlinga i Polen tok landslagstrenar Scott Olsen med seg heile åtte spelarar frå dei to beste laga i Norge.

Fem frå dobbeltmeister Nyborg, medan altså tre av spelarane kjem frå Førde – som tok sølv i både cup og serie.

– Sesongen i Norge er ferdig, og det blir langt mellom sesongane. Samlinga med landslaget gjer at vi «held det gåande», får masse touch og held oss i form. Samstundes møter vi ganske gode lag og får utvikla oss, avsluttar Loftesnes.