Sjølv om laget har sørga for eit etterlengta opprykk til nettopp 2.divisjon, er baneforholda for laget av dei dårlegaste i heile Sogn og Fjordane.
Må reise til Eikefjord eller Sande for å trene langpasningar
Så dårleg er det at dei ikkje får trene på heimebane. Noko som gjer at fotballherrane må hospitere på andre baner i sesongoppkøyringa.
Ei av dei er sjuarbane på Haugum. Den ser lita ut under føtene på vaksne fotballspelarar. Om Førde-kapteinen og dei andre skal trene langpasningar må dei reise lenger.
- For å få spele på stor bane, som vi helst bør, så må vi reise til Eikefjorden eller Sande, seier Førde-kaptein, Steinar Tenden.
Får ilt av å spele på heimebane
For heimebana, Førde Stadion held ikkje mål og gjer vondt for både fotballeggar og lår ifølgje kapteinen.
- Kunstgrasbana på stadion er litt gammal og hard, så trening der har vi berre kutta, forklarar Tenden.
Uhaldbart meiner kretsen
I Sogn og Fjordane fotballkrets likar dei dårleg at Førde som er heimelaget til rundt 1300 fotballspelarar i alle aldrar ikkje har god nok banekapasitet. Kretsleiar Svein Ove Myklebust meiner situasjonen er uhaldbar.
- Behovet i Førde har eg nesten ikkje ord for, det er svært mangelfullt slik det er i dag, seier Myklebust.
Stolar ikkje på lovnadane til kommunen
Også ordførar Nils Gjerland jubla då Førde i fjor haust tok steget opp i ein gjevare divisjon, men gjeve baneforhold lar vente på seg.
- Dette vert jobba med og skal bli betre. Vi har laga planar på Hafstad og går rett inn i detaljplanlegging no, seier Gjerland.
Det har Førde-kapteinen ikkje veldig stor tru på.
- Eg har høyrt om dei planane sidan eg kom til Førde, og eg synst ikkje kommunen har kome så veldig mykje lengre, seier Tenden.
- Har det noko å seie for sesongoppkøyringa at laget ditt ikkje får trene på heimebane?
- Ja, det er klart. Hadde vi fått trene og spelt heimekampar i Førde, noko vi ikkje gjer vinterstid, så hadde det nok vore litt annleis, seier Tenden.