- Skummelt og uverkeleg i trygge Erdalen

– Det er litt uverkeleg at noko slikt skal skje i den trygge Erdalen. Vi er ikkje vant med eit slikt politioppbod som har vore her i helga.

Det seier John-Magne Erdal som bur i Erdalen i Oppstryn. Der leiter no politiet framleis etter mannen som flykta dit laurdag ettermiddag. Då hadde han truga til seg ein bil med kniv.

SISTE: Det er no avslutta søk med helikopter. Men mannskap frå Raude Krossen og politiet held fram leitinga. Dei vurderer fortløpande kor lenge dei skal halde på ut over kvelden.

• LES OGSÅ: Her fann politiet mannen sin bil - oppe i dalen og heilt inst i vegen
• LES OGSÅ: Åtvarer mot ustabil mann - politiet har væpna seg

– I går bad politiet dykk om å låse dørene og ta nøklane ut av bilane. Korleis er det å få ein slik beskjed?

– Nei, det er ikkje noko kjekt. Det seier seg sjølv. Vi låste både bilar og hus, og prøvde å vere forsiktige.

– Som å leite etter nål i høystakk

Politiet har ingen spor etter mannen som kjem frå Rogaland. Han er i 20-åra, tynn og om lag 180 centimeter høg.

– Vi har ingen observasjonar. Det er nesten som å leite etter nåla i høystakken, seier operasjonsleiar Stig Inge Hauge.

– Vi har ikkje sett noko til denne karen. Så det er ingen som veit kvar han er, seier Erdal.

• LES OGSÅ: Politiet starta opp att leitinga - har med helikopter og redningshundar

I natt var det om lag 15 minusgrader i området.

– I føremiddag er det 11 minusgrader her med ein kald trekk frå breen. Det er ikkje noko bra å gå ute utan gode klede.

Har sperra av dalen

Over 50 personar bur i Erdalen. Både småbarnsfamiliar og pensjonistar.

– Vi har ungdommar som skulle på fest i går kveld, så då valte vi å hente og bringe til døra, fortel Erdal.

Både i natt og i dag har politiet sperra av inngangen til dalen. Alle bilar som skal inn og ut av dalen blir kontrollerte. Folk som ikkje har eit naudsynt ærend, blir ikkje slept inn.

– Det er litt kjedeleg viss dei ikkje greier å finne han. For då veit ikkje kva som luskar rundt her, seier John-Magne Erdal.