Både G16 og juniorane vann semifinalane sine i dag. Trenar Terje Rognsø er imponert over prestasjonen til gutane.
– Det har vore ein fantastisk innsats av laga, seier han. Saman med Bengt Solheim Olsen og Geir Rindheim har han ansvaret for laga under turneringa i Hjørring i Danmark.
– Det er vel fortent og dei spelte den klart beste fotballen i semifinalane.
Vann straffesparkkonkurranse
G16 vann 2–1 i semifinalen mot det tyske laget Düren-Niederau 08 og juniorane vann på straffekonkurranse mot Jerv 1919.
– Ved ordinær tid var stillinga 1–1. Resultatet av straffesparkkonkurranse blei 7–6 til oss, fortel han.
Finalane blir spelte laurdag. Klokka 13:10 spelar juniorane og klokka 17:30 er det klart for G16-finalen.
– Akkurat no veit eg ikkje kven vi skal møte. Men vi har spelt på vanskelege baner, så no skal det bli godt å spele på ein stadion i morgon, seier Rognsø.
Knapp tid til ferja
Dei kom sist laurdag og skal reise heim i morgon kveld. Han seier han er spent på om dei rekk ferja som går klokka 20.
– Viss ikkje, så får vi køyre rundt, seier han.
Florø sitt jentelag er klar for B-finale.
Vik i finalar
Også Vik har gjort det bra i Danmark. Gutar 15-laget tapte fredag kveld semifinalen,og tok bronse i A-sluttspelet.Jenter 16 år er klare for finale i B-sluttspelet.
Vikjene stilte med til saman tre lag på Dana Cup.