No er denne vegen som regel open når alle dei andre fjellovergangane er stengde også i dag, men i framtida vil det vere heilt slutt på stengingane på E16, seier avdelingsdirektør Nils Magne Slinde i Statens vegvesen.
– Vi har ei målsetting om at når vi byggjer ny E16 skal ikkje den vegen bli stengd på grunn av vinterproblem i det heile.
Vêrtilhøva på fjellovergangane mellom Sogn og Fjordane og Austlandet kan vere svært så tøffe på vinterstid. Riksveg 52 over Hemsedalsfjellet, fylkesveg 53 Årdal-Tyin og og fylkesveg 50 Aurland-Hol er dei mest utsette for stenging.
- LES OGSÅ:
- LES OGSÅ:
Men også E16 over Filefjellet blir innimellom stengd på grunn av dårleg vêr og av vogntog som køyrer seg fast. Men det skal det, ifølgje Nils Magne Slinde, bli slutt på når opprustingsarbeidet på Filefjellet er ferdig.
– Vi byggjer vegen slik at heile stigninga på begge sider blir teken i tunnel, med andre ord berr veg for både store og små køyretøy, slik at dei kjem seg trygt og godt opp på fjellet. Og ute i dagen løfter vi vegen slik at snøen i størst mogeleg skal grad skal blåse av, slik at sikta blir god.
Heile vegen ferdig i 2017
Arbeidet med oppgradering av E16 over Filefjellet skal vere ferdig i 2017, kostnaden er på 2,87 milliardar kroner for heile strekninga. Dei siste åra har det vore arbeidd på strekninga Borlaug-Smedalsosen. Denne delen av vegen blir opna for trafikk i år.
Til våren startar arbeidet på ei anna strekning, frå Smedalsosen til Varpe bru aust for Tyinkrysset på Oppland-sida. Då skal vegen leggast i tunnel i stigninga opp frå Tyinkrysset og i fjellet forbi Nystova.
Vel likevel Hemsedalsfjellet
Fylkesleiar i Lastebileigarforbundet, Rolf Olav Tenden, er glad for at vegen over Filefjellet snart er ferdig utbetra, men seier dei fleste langtransportsjåførane truleg likevel vil nytte vegen over Hemsedalsfjellet.
– Dei likar traseen over Hemsedalsfjellet betre, og det har dei gjort i alle år. Det kjem dei til å halde fram med så lenge fjellet er ope og trafikken er som han er. Dei må vidareføre vegutbetringa på E16 frå Vang i Valdres og vidare mot Oslo skal dei få flytta meir trafikk over til Filefjellet.
Og i juni i år blir strekninga frå Borlaug via Hemsedalsfjellet til Oslo korta ned vesentleg når den 17 kilometer lange strekninga frå Ørgenvika til Sokna blir opna. Men Tenden ser likevel ikkje arbeidet på Filefjellet som bortkasta.
– Nei, ikkje bortkasta. Du får ein 100 prosents gjennomgang frå aust til vest, og det er det viktigaste. Eg er veldig glad for at vi har ein forutseieleg veg å kome gjennom på, uansett vêr og føre.