Eit by-mot-land-derby i Bergen by.
Arna-Bjørnar – Sandviken er ein klassikar i norsk kvinnefotball, og dei siste åra har Arna-Bjørnar vore favorittar. Arna-Bjørnar, laget frå bygda i byen, har vore i øvste divisjon sidan 2006, medan naborivalane Sandviken rykka ned i både 2013, 2009 og 2007.
No er situasjonen snudd på hovudet. Sandviken tok cupsølv i fjor, og på vinteren har dei forsterka laget. Heile fem av dei nye spelarane kom frå nettopp Arna-Bjørnar.
For første gong sidan overgangane skal dei tilbake til Arna idrettspark 1. mai klokka 14.
– Både meg og andre har spilt i Arna-Bjørnar i mange år og er blitt glade i klubben, men vi skal sørge for at vi drar derifrå med tre poeng, seier Maria Brochmann.
– Dårleg samvit
Ho forlét Arna til fordel for bylaget Sandviken i vinter, saman med Amalie Eikeland, Cecilie Kvamme, Lisa Naalsund og Ingrid Stenevik.
– Sjølvsagt fekk eg litt dårleg samvit då det skjedde slik det gjorde, og det skjedde plutseleg. Men vi må tenkje på kva som er best for oss, og for min del følte eg at tida var inne for eit klubbskifte, seier Brochmann.
For ho og dei andre i kvitt har sesongen starta bra. Dei ligg på fjerdeplass og Brochmann har scora fire mål på fem kampar.
Spesielt då lagvenninnene drog
På motsett banehalvdel stiller Arna-Bjørnar-kaptein Helene Gloppen. Ho har bakgrunn frå Sandviken, men gjekk over til Arna-Bjørnar i 2017, då dei var det beste kvinnelaget i byen. No ligg dei på åttandeplass, fire poeng bak Sandviken.
Det var spesielt då fem lagvenninner bytta beite i vinter.
BT skreiv at Arna-Bjørnar hadde sette seg sjølve i ein vanskeleg situasjon, og Arna-Bjørnar-leiar Synnøve Tverlid innrømma at det var ein lærepenge.
– Det var spesielt i perioden rundt jul då vi fekk vite at alle skulle dra, vedgår Gloppen.
– Men no har vi det veldig kjekt og har fått inn mange gode spelarar.
Spenning
Sesongstarten deira har vore tråare med berre ein siger på fem kampar. No håper dei at det smell i byderbyet mot Sandviken.
– Eg kjenner at det bygger seg opp ei spenning. Byderby er alltid kjekt, og spesielt i år når så mange spelarar har gått herifrå til Sandviken.
– Korleis skal de slå dei?
– Vi har laga ein plan, men eg kan ikkje seie korleis. Det må vere hemmeleg, seier Gloppen.
Kampen startar klokka 14. Klokka 18.30 tar herrelaget til Arna-Bjørnar imot Sportsklubben Brann til 1. runde i cupen på same arena.