Meteorologisk institutt utvida torsdag føremiddag eit gult farevarsel for is i Sør-Noreg og varslar utfordrande køyreforhold i store deler av landsdelen.
Farevarselet strekk seg no frå Sauda i Vest, gjennom heile Agder og Telemark, til Austlandet nord for Oslo.
– Med lågtrykket som kjem inn frå sør i dag, kan det bli både regn, snø og underkjølt regn, skriv Meteorologisk institutt på X.
– Men resultatet blir for mange det same: Utfordrande køyreforhold.
Startar først heilt sør
Farevarselet har litt ulike startspunkt basert på kor i Sør-Noreg ein er, seier statsmeteorolog Julie Solvik Vågane.
– I Agder har det allereie starta, mens i vest er det venta å bli isete på vegane rundt lunsjtider. På austlandet kjem ikkje temperaturendringa før i kveld, seier ho.
Varselet gjeld ut lunsjtider fredag. Likevel kan det vera utfordrande køyreforhold også etter det.
– Me varslar først og fremst om dette overraskingsmomentet. Det kan likevel vera glatt utover fredag ettermiddag og kveld. Laurdag ser det ut til å bli fint, seier Vågane.
Glatt start på vinterferien
Fredag er starten på vinterferien for mange i Sør-Noreg.
Statsmeterologen seier det ikkje ser heilt mørkt ut for dei som vil kome seg trygt til fjells.
– Eg vil anbefala å sjekke ut lokale vêr- og vegforhold og vurdere ut i frå det. Men skal du ut på vegen i dag eller morgon føremiddag bør du rekne ekstra god tid, seier Vågane.
Ho forklarar at det er underkjølt regn som er det skumlaste.
– Det er når regn legg seg på kald bakke og frys til umiddelbart. Det er vanskeleg å sjå på vegen, og med regn i lufta tenkjer kanskje bilføraren at det ikkje er glatt. Men det kan vera svært glatt, seier ho.
