Politiet fekk melding om ulukka like før klokka 11. Fallskjermhopparen fekk problem i lufta, og skal ha treft bakken i stor fart.
Mannen vart køyrd med ambulanse til sjukehuset på Voss.
Helse Bergen skriv i ei pressemelding klokka 15.20 at mannen er alvorleg skadd.
Fleire vitne
Rune Haugseng var på Bømoen og såg det som skjedde:
– Fallskjermhopparen gjekk i spinn ganske høgt oppe. Det hele så først planlagt ut, men så mista han kontrollen.
Mannen skal ha treft graset i enden av rullebanen på flyplassen på Bømoen. Naudetatane var raskt på staden og køyrde den skadde hopparen vekk i ambulanse.
Skal granske ulukka
Ekstremsportveko vert no avvikla på Voss.
– Den skadde fallskjermhopparen deltok i arrangementet, men hoppet i dag var ikkje del av nokon av konkurransane, seier Arild Tvilde i Ekstremsportveko.
Fallskjermklubben på Voss skal no sjå nærmare på det som skjedde.
