Lensmann i Sogndal, Jan Tore Thue er ein av dei som står bak undersøkinga. Han seier han er bekymra for dei dette gjeld og familiane til deira.
- Dette er sjølvsagt noko vi tek innover oss og uroar oss over. Men dette må vi ta med oss, og rette ein ekstra innsats mot, seier Thue.
Åtte av 570
Det er snakk om små tal og store prosentar når ein reknar på narkotikabruk blant ungdom i Sogn. Av 570 skuleelevar frå åttande klasse og opp til andre klasse på vidaregåande, svarar åtte at dei brukar narkotika meir enn to gonger i månaden, mot fem i same undersøking i fjor.
Positiv tendens
Difor vel Thue å fokusera på dei positive sidene ved undersøkinga. Dei som viser at færre ungdommar brukar narkotika, alkohol og tobakk, og at fleire tek avstand til narkotika.
- Ja, eg tykkjer det er viktig å fokusera på den positive tendensen, nemleg at færre brukar narkotika. Og gleda oss over den flotte ungdommen vi har i regionen, seier han.
Rosar arbeidet
Også ordførar i Sogndal, Karen Marie Hjelmeseter, er mest oppteken av å rosa jobben kommunar, skular og politi gjer. Men ho registrer at talet ungdomar som faktisk har eit problem med narkotika er aukande.
- Det er berre nokre få som brukar det ofte, men det er klart at vi må sjå på dette problemet og kva som må gjerast, seier ho.
Må få hjelp
Lensmann Thue ser på desse brukarane som ei gruppa dei ikkje når fram til med vanleg førebyggingsarbeid, og som må nåast på andre måtar.
- Det er viktig både at politiet avdekkar denne type kriminalitet, og at dei som har blitt avhengige av narkotika får hjelp, seier han.
