- Det er klart bilistane kan hente mykje på dette. Hadde det ikkje vore for konkurrentane, hadde vi lege på vanleg literpris, seier Jan Farsund ved Esso-stasjonen i Førde.
Måndag morgon var prisen for 95 oktan bensin i Førde nede i 10,49 kroner per liter, medan dieselen kosta 9,49 kroner for literen.
Klokka 13.30 same dag spratt prisane opp med bortimot to kroner: 95 oktan kosta plutseleg 12,27 kroner per liter, medan du måtte ut med 11,12 kroner for diesel.
Prisane går opp to gonger i veka
- Dette skjer to gonger i veka. Det er konkurransen med andre bensinstasjonar som gjer det, seier Magnor Hornnes ved Shell-stasjonen i sentrum sør.
Han forklarer vidare:
- Vi har fått beskjed om at vi skal vere prisleiande i Førde. Det gjer at vi set ned prisane to-tre gonger om dagen. Så løftar vi prisane torsdag og måndag - det er fast, seier han.
Shell sentralt bestemmer
Då NRK snakka med bensinsjefane i Førde måndag kveld, hadde prisane igjen gått noko nedover; no til høvesvis kroner 12,12 for 95 oktan og 11,12 for dieselen.
Og slik held nok prisane fram med å synke fram mot torsdag - då det kjem eit nytt prishopp.
- Vi har fått beskjed om at måndagar og torsdagar skal prisane opp til ein pris Shell avgjer sentralt, forklarer Hornnes.
- Kva mekanismer det er snakk om her, må du spørje Esso sentralt om. Vi i Førde justerer prisane våre etter konkurrentane, slik at vi heile tida er konkurransedyktige på pris, seier Farsund.
- Billegare enn i Bergen
Billegast drivstoff fyller du på tanken din på føremiddagane måndagar og torsdagar, skal ein tru Hornnes ved Shell i Førde.
- Eg veit om mange frå Bergen, som stoppar her for å tanke når dei køyrer forbi Førde - rett og slett fordi vi er billegare, seier han.
- Er ikkje situasjonen noko spesiell i Førde?
- Jo. Men vi har fått indikasjonar på at vi skal vere billegast, og då blir det slik, seier Hornnes.
Ekstrem priskrig i Førde
Shell og Esso i Førde ligg på kvar si side av Hafstadvegen i sentrum, og har til ei kvar tid full kontroll på prisane til konkurrenten.
Men også dei andre bensinstasjonane i sentrum er snare til å følgje prisnivået.
På det meste svingar prisane opp mot to kroner per liter. For den som følgjer med på prisane, kan det fort utgjere ein hundrelapp for ein full tank.
- Det verkar som om priskrigen er meir ekstrem i Førde enn andre stader. Men sånn er livet - det er ein kamp om litrane, seier Hornnes.
- Det er greitt for oss. Men det er klart; ein må følgje med heile tida, slik at vi er à jour, seier Farsund.
PS: LItt over klokka 21.00 måndag kveld var prisane nede i kroner 11,99 for 95 oktan og 10,85 for diesel.