– Hillary representerer dei som har styrt der borte dei siste 35 åra, og dei har jo ikkje gjort noko særleg, seier Steven Standal.
Norsk-Amerikanaren er ikkje overbegeistra over Trump, men likevel klar på at den kontroversielle kandidaten får støtta hans. Broren hans Kenneth Bjørbæk-Standal er likevel heilt usamd.
– Eg tykkjer ikkje dei er særleg gode nokon av dei, men sidan eg må velje, så røyster eg likevel på Clinton.
Oppheita diskusjonar under middagen
Kenneth kan forstå noko av tiltrekkingskrafta mot Trump, men meiner likevel eigedomsmogulen er ueigna som president.
– Eg skjønar at folk likar å høyre det Trump seier. Eg forstår at folk er sinte og opprørte over systemet, og kor mykje pengar som er involvert i valkampane, men eg trur rett og slett ikkje at Trump vil fungere som president, seier Bjørbæk-Standal.
Broren Steven rister på hovudet av dette utsagnet.
– Trump vert jo uansett ikkje ein eineherskar. Alt han gjer skal igjennom senatet og kongressen, og dessutan har han mange dyktige folk i ryggen også.
– Korleis er stemninga under familiemiddagen når de er så ueinige, då?
– Det kan bli ganske oppheita, for vi er sta begge to. Men det går som oftast bra til slutt, fortel Kenneth.