Nærleiken barnehage i Førde køyrer sin eigen store bil med alle borna samla. Det er eit styr å få alle ungane ut og med rette skia.
– Jo da, men styr er kjempegøy det! Så dette liker vi, seier pedagogisk leiar Sveinung Nordtveit.
I dag har dei som mål å skli ned ein heilt spesiell bakke. Kjem Nomi og Una som går i barnehagen til å klare det i løpet av dagen?
Nordtveit har full kontroll over borna. Ungane blir tekne med på tur i nesten all slags vær.
Det viktigaste er at borna får gode opplevingar og erfaringar.
– Det å la ungane få utfolde seg, er topp. Så får vi heller tole å kave og mase litt, seier han.
I dag er det ein spesiell bakke dei har lyst til å meistre. Det er bakken ned til stadion og i dag skal dei prøve seg.
Gamalt klister gjer ingenting
Ungane kjenner godt området og dei gjer seg klare. Han har ikkje krav til noko som helst anna enn at borna må ha ski og stavar. Han er ute etter skiglede.
– Kanskje er det nokon som har klister frå påska i fjor, men det gjer ikkje noko.
Det viktigaste er å ha ski på beina. Sveinung har opplevd mykje moro med born som har ski på beina for fyrste gong. Dei har ei bratt læringskurve og klarar det forholdsvis kjapt.
– Det er klart at vi tek det som ein bonus at dei kanskje kan bli så gode at eg kan sitje på gamleheimen og sjå at dei vinn pokalar. Men det er ikkje så nøye.
Dei har det gøy. Men det kan og bli litt konflikt og konkurranse dei imellom.
Nomi og Una skal prøve seg på bakken. Begge blir fem år dette året og har vore med tidlegare. I starten så tykkjer nok Nomi at Una går litt sakte, men etter kvart går det betre. Ein av dei blir nok litt overraska då den andre plutseleg berre går heilt opp i bakken og står heilt ned fyrste gongen ho prøver.
Men kven av dei som fyrst klarer å stå ned bakken, ja det må du sjå i videoen eller i Norge Rundt. Du kan også sjå borna i Norge Rundt på NRK 1 fredag 13. februar kl. 19.40