Klassequizen rullar vidare i fylket, og i dag var turen komen til Gulen kommune. Her skal i alt tre skular få bryne seg på spørsmål om mykje og mangt.
Og dei to første som var i aksjon i dag var Dalsøyra skule og Byrknes skule.
- LES: ALT OM KLASSEQUIZEN
– Vi er litt nervøse fordi det er mange som høyrer på, seier Lasse Virkesdal, Julie Vabø og Nina Hjartholm.
Dei skulle forsvare æra til Dalsøyra skule.
– Heile klassen sit iallefall å høyrer på, smiler Julie.
Lasse fortel at det er sport og hovudrekning som er deira sterke side. Og det viktigaste er å slå skulane på Byrknes og Eivindvik.
- Vi skal bevise at vi er best i Gulen!
Imponerande start
For å klare det måtte dei svare rett på spørsmål frå kategoriane «sju», «kald og varmt» og «Danmark».
Og det byrja riktig så godt. I dei to første kategoriane samla dei seks av åtte moglege poeng, etter å ha svart riktig på mellom anna kva idrett som har sju spelarar på bana.
Alt låg difor til rette for ein høg poengsum, men i siste kategori bomma dei på kva øy byen København ligg på. Her vart det to av fire moglege poeng.
Det betyr at Dalsøyra sanka åtte av tolv poeng:
– Vi gjorde det vi kunne og vi er nokonlunde fornøgde.
– Eg trur nok klassa kjem til å le når vi kjem tilbake til klasserommet, ler Julie.
- Uflaks
Deretter var det Byrknes skule sin tur, og dei tre karane Rune Baarøy, Jørgen Unneland Larsen og Kjell Alexander Melheim var klare til dyst.
– Dei har ikkje sjans til å slå oss.
– Men vi er litt usikre på kva spørsmål vi får. Vi håpar på geografi, men fryktar norsk og litteratur, innrømma dei.
(Artikkelen held fram under biletet)
Dei tre elevane på Byrknes fekk spørsmål om litt av kvart, og i den første kategorien «jord» åpna dei sterkt.
Med tre av fire poeng, der dei mellom anna hadde kontroll på at sau er det husdyret det er flest av i fylket, låg dei likt med Dalsøyra etter fire spørsmål.
Men deretter gjekk det trått. Med to poeng i kategorien «dom» og eitt poeng i siste kategori «ord og tal» samla dei totalt seks poeng.
Fattige to poeng bak rivalane på Dalsøyra skule.
– Vi er godt nøgde egentlig. Det var jo ganske dårlege spørsmål, ler dei tre i kor.
– Det var berre uflaks som gjorde at vi ikkje vann over Dalsøyra, smiler Rune, Jørgen og Kjell Alexander.
Eivindvik skule er den siste i Gulen som skal ut i aksjon. Dei får besøk av Klassequizen 28. januar.
Trio på topp
Enn så lenge er det framleis Kvåle skule i Sogndal, Farnes skule i Årdal og Vassenden skule i Jølster som ligg best an i Sogn og Fjordane.
Dei har alle sanka ti av tolv poeng.
- LES OGSÅ:
- LES OGSÅ:
- LES OGSÅ:
- LES OGSÅ:
Spørsmåla Dalsøyra skule fekk
Kategori 1, sju
1) Kva er dei sju søstre i Nordland? Rett svar: Fjellkjede
2) Kva er etternamnet på dei to som gav ut «Den sjuande far i huset» og andre norske eventyr? Rett svar: Asbjørnsen og Moe
3) I kva for ein av desse idrettane er det sju spelarar på laget? Ishockey, handball eller volleyball? Rett svar: Håndball
4) På ei øy i Sogn og Fjordane er det oppretta sju verksemder på sju år sidan 2005. Kva heiter øya? Rett svar: Mjømna
Kategori 2, kaldt og varmt
1) Kva for ein varm drikk blir knytt til Lipton og Twinings? Rett svar: Te
2) Kva for eit land i verda har flest aktive vulkanar? Rett svar: Indonesia
3) Ranger desse isbreane frå størst til minst: Hardangerjøkulen, Jostedalsbreen og Vestre Svartisen. Rett svar: Jostedalsbreen, Vestre Svartisen og Hardangerjøkulen.
4) Den lågaste temperaturen som er målt i Sogn og Fjordane er -34,3 grader. Den høgaste er +33,3. Desse målingane er gjort i ein og same kommune, kva kommune er det? Luster, Førde eller Vågsøy? Rett svar: Luster.
Kategori 3, Danmark
1) Kven har skreve eventyret «Den stygge andungen»? Rett svar: H.C Andersen
2) Kva er det norske ordet for kartoffel? Rett svar: Potet
3) På kva øy ligg København? Rett svar: Sjælland
4) Eit dansk flyselskap driv rute mellom Florø og Stavanger. Kva heiter dette selskapet? Rett svar: Danish Air Transport
Spørsmåla Byrknes skule fekk
Kategori 1, jord
1) Kvar kjem opprinneleg poteta frå? Rett svar: Sør-Amerika
2) Kven skreiv romanen «Markens grøde» Rett svar: Knut Hamsun
3) Kva heiter lina som deler jordkloden i ei nordleg og sydleg halvkule? Rett svar: Ekvator
4) Kva slags husdyr er det flest av i Sogn og Fjordane? Rett svar: Sau
Kategori 2, dom
1) I kva kyrkje gifta prinsesse Martha Lousie og Ari Behn seg? Rett svar: Nidarosdomen
2) I kva land ligg FN sin internasjonale domstol i Haag? Rett svar: Nederland
3) Kva jobba Sven Holden som under 22.juli rettsaka? Rett svar: Aktor
4) Ein stad i Sogn og Fjordane vart folk dømde alt på 1100-talet. Dette skjedde på eit ting der folk samla seg ein gang i året. Kva heiter dette tinget? Rett svar: Gulatinget
Kategori 3, ord og tal
1) Kva er eit anna ord for språkforskar? Rett svar: Lingvist
2) Kva for ein amerikanar er kjend for orda «I have a dream»? Rett svar: Martin Luther King
3) I kva land føregår handlinga «Kongens tale» frå 2010? Rett svar: England
4) Kva heiter fylkesordføraren i Sogn og Fjordane? Rett svar: Åshild Kjelsnes