Det var i 14.30-tida måndag ettermiddag at eit polsk vogntoget køyrde av vegen ved Erdalen utanfor Førde.
Fekk køyreforbod
Vogntoget kryssa først motgåande køyrefelt før det hamna ute på ein bø. Til alt hell var det ingen andre bilar involvert i uhellet som heller ikkje førte til trafikale problem.
Vogntoget fekk hjelp av lokale folk med traktor til å kome seg på vegen att.
Politiet reiste til staden og kontrollerte vogntoget
- Det polske vogntoget som køyrde av vegen hadde berre fire kjettingar. Det er påbode med sju kjettingar, og politiet har gitt sjåføren køyreforbod fram til det har på plass sju kjettingar, seier operasjonsleiar Eivind Bjørke hos politiet.
Bøtelagt
Vogntoget som hamna i grøfta skal ha køyrt saman med eit anna polsk vogntog. Heller ikkje dette hadde nok kjettingar.
På bakgrunn av dette har politiet gitt dei to sjåførane kvar si bot på 5000 kroner.
Politiet vil halde vogntoga tilbake til tysdag for å sikre seg bankgarantiar og for å sikre at vogntoga får på plass nok kjettingar.
Ifølgje politiet var det glatt køyrebane på strekninga då uhellet skjedde.
Det er ikkje meldt om personskader.