Bil fall ti meter ned i elv: – Han kunne blitt meir skada

Kl. 11.16 blei det meldt om ei trafikkulukke like utanfor Førde sentrum i Sunnfjord.

Ein bil gjekk over autovernet og hamna i elva ti meter ned på fylkesveg 609 vest for Førde.

Ein person er involvert i ulukka og er sendt til Førde sentralsjukehus.

– Personen har vore medviten heile tida, men har smerter i mageregionen, seier innsatsleiar på staden Ole Jørgen Eide.

Eide fortel at det kunne gått verre.

– Han har falle utfor ein relativ høg skrent og ned i ei elv, så han kunne ha blitt meir skada enn det han blei, seier innsatsleiaren.

Bilen stod utfordrande til i elva, men like før klokka eitt blei bilen heist opp frå juvet.

Vegen er open igjen etter hendinga.

Ulukka blei meldt inn av ein som var i området og politiet har tatt avhøyr på staden.