Mellom bedriftene som tente meir pengar var Slinde Transport AS i Sogndal. Årsresultatet før skatt var i fjor 1.252.000 kroner, medan det i 2010 var 144.000 kroner.
Magne Ahlin er dagleg leiar for dei 30 tilsette i Slinde Transport AS. Han forklarar framgangen med at det generelt går bra i næringslivet og i landet elles.
– Transportnæringa er ein god indikator på tilstanden i næringslivet. Går det godt er det meir varer som skal fraktast. Det var tilfelle i 2011, difor gjekk det bra for oss.
Han seier at 2012 også ser ut til å bli eit godt år.
– Det er ikkje noko som tilseier at ikkje trenden frå i fjor held fram. Vi er underleverandør til ein av dei store aktørane i Norge, Tollpost Globe, og det er eitt av dei selskapa som har hatt størst vekst i 2011.
Og Slinde Transport er slett ikkje åleine om å ha ei positiv utvikling. På Sande i Gaular er det to transportselskap som begge betra resultatet:
- Magnus Nistad AS med 23 tilsette snudde eit underskot på 1.554.000 kroner i 2010 til eit årsresultat før skatt på 1.224.000 kroner i 2011.
- Sygna Transport AS hadde eit årsresultat før skatt i fjor på 1.086.000 kroner, mot 629.000 kroner i pluss i 2010.
Per A. Øren AS best i klassen
Per A. Øren AS i Høyanger med 49 tilsette auka resultatet før skatt frå 1.395.000 kroner i 2010 til 3.052.000 kroner i 2011. Her må det nemnast at berre om lag halvparten av dei tilsette driv med transport, den andre halvparten arbeider i eit eige selskap som driv som maskinentreprenør.
Per A. Øren AS har greidd å omstille seg etter at dei miste transporten av bilfelgar frå Fundo, og Høyanger-selskapet er det som leverte det beste resultatet av dei transportbedriftene det er 2011-tal for.
Per Bortheim Transport AS i Florø har 18 tilsette. Der vart eit minusresultat på 1.411.000 kroner i 2010 snudd til pluss: Eit resultat på 1.002.000 kroner i fjor.
Hoff & Knutson Transport AS i Førde har 33 tilsette. Dette firmaet auka resultatet før skatt frå 433.000 kroner i 2010 til 1.002.000 kroner i fjor.
Thor Tenden Transport AS unnatak
Unnataket frå den positive trenden er Thor Tenden Transport AS i Stryn. Det store transportfirmaet med 35 tilsette hadde eit resultat før skatt på 1.089.000 kroner i 2010. I fjor var det redusert til skarve 59.000 kroner.
Dagleg leiar Rolf Olav Tenden forklarar nedgangen slik:
– I 2011 var det i ein periode svært høg dieselpris som vi ikkje hadde teke høgde for i anboda, i tillegg etablerte vi vår eigen verkstad og tok avskrivingar på den, så det er ikkje nokon dramatikk i desse tala.
I tillegg var arbeidet i tunnelane på Strynefjellet med lange stengingsperiodar ein hemsko for Thor Tenden Transport AS. Det kan det bli også i haust, men Rolf Olav Tenden trur dei skal takle det betre no.
– Vi har lært oss å køyre alternative ruter, og så håpar eg at det blir med dei to månadene med tunnelarbeid som er varsla frå 1. september.
- LES OGSÅ:
Uansett ser 2012 langt lysare ut enn fjoråret, seier Tenden.
– Vi har over millionen i overskot i første halvår, og det er vi veldig nøgde med.
Men han seier at transportbransjen ikkje er noka gullgruve der eigarane kan rekne med store overskot.
– Det er høg aktivitet, men prisane er pressa, og det er vanskeleg å gje faste prisar når dieselprisen varierer så mykje som han gjer. Og når bilmateriellet skal skrivast ned på fem år så seier det seg sjølv at det ikkje er lett å få dei store overskota.
Byrknes Auto og Transferd manglar
2011-rekneskapen til dei to største transportselskapa i Sogn og Fjordane, Byrknes Auto AS på Byrknesøy og Transferd AS i Førde (tidlegare Firda Billag) er ikkje tilgjengeleg enno.
Transferd AS har 125 tilsette og hadde eit resultat før skatt på 6.927.000 kroner i 2010.
Byrknes Auto AS har 146 tilsette fordelt på Byrknesøy, Tromsø, Ålesund, Åsane og Oslo og er det 14. største transportselskapet i landet. 2010-rekneskapen viste eit resultat før skatt på 821.000 kroner, medan tala frå 2011 altså ikkje er tilgjengelege enno.
Heller ikkje for Standnes Transport AS i Sogndal er 2011-rekneskapen tilgjengeleg enno. Der var resultatet før skatt i 2010 på minus 341.000 kroner.