Fangsten utgjorde 30 686 kilo. Til saman vart det i 2010 fiska 5838 laks med ei samla vekt på 18 911 kilo.
Christian Platou fekk også napp i Eidselva i år. Denne laksen vog ni kilo.
Foto: Harald Kolseth (MMS-foto) / NRKSidan 1993 er det berre to år det er landa fleire laks. Det var i 2000 og 2005. Dei siste fem åra har det vore auke kvart år.
– Oppløftande
– Jau, det har vore ein bra sesong med oppløftande fangsttal, stadfestar leiar Svenn Morten Eikeset i Eid Sportsfiskarlag.
I Eidselva auka fangsten frå ca. 1500 kilo i 2010 til 2500 kilo i år. Den største laksen vart teken tidleg i sesongen av Gunnar Olsmo. Den vog 15,5 kilo.
– Vi ser lyst på utsiktene for 2012- sesongen og. Vi har fått signal på at det ikkje blir lagt opp til endringar i fisket i elva frå styresmaktene si side, og det er vi nøgde med.
Mykje mellomstor laks
Det er godt innsig av mellomstor laks (3-7 kilo) som er hovudårsaka til det gode fisket i år. Laks i denne storleiken utgjorde over halvparten av fangsten.
Dei elvane som har hatt den mest positive utviklinga er Aurlandselvi, Eidselva, Gloppenelva, Jostedøla og Loelva. I andre elvar har det vore nedgang i fisket.
Ikkje all fangsten hamna i frysaren. 2031 av laksane som vart landa vart sette uti att.
Verre med sjøauren
Det var ein liten auke også i fisket av sjøaure i elvane. Men den auken var liten, og i historisk samanheng var fangsten på 3351 aurar på til saman 5279 kilo ikkje mykje å slå i bordet med. I 1973 vart det til samanlikning landa 12 200 kilo sjøaure.
Årøyelvi i Sogndal hadde ikkje like positiv utvikling som Eidselva. Dette biletet er frå 2010, og det er fotballspelaren Espen Olsen som her har bytt ut fotballsko med stang.
Foto: Harald StormoenSjølaksefisket drastisk redusert
I 2010 var laksefisket i sjøen i Sogn og Fjordane det dårlegaste nokon gong, og 2011 var ikkje stort betre. Viktigaste årsaka er at sesongen for kilenotfiske er innkorta. I år er det fanga ca. 2300 kilo laks i sjøen.
– Restriksjonane i sjølaksefisket er nok ein av grunnane til at det blir fiska meir i elvane, seier Svenn Morten Eikeset i Eid Sportsfiskelag.
Stabil andel oppdrettslaks
I Eidselva er rundt fem prosent av fangsten i sesongen oppdrettslaks. Det talet har halde seg stabilt dei siste åra. I år vart det fanga ein oppdrettslaks som vog 13,5 kilo i elva.
– Oppdrettslaksen går opp seinare på året enn villaksen. Vi hadde eit prøvefiske i haust, og der var det vel 30% oppdrettslaks. Heldigvis er det no mykje mindre regnbogeaure i Eidselva enn i fjor, seier Eikeset.