For høgt gras og hageavfall var ei medverkande årsak til at flammane spreidde seg så raskt som dei gjorde under lærdalsbrannen i januar.
I Lærdal bles vinden frå aust. Som den gjorde den januarnatta då store delar av bygda brann. Den gong gjorde vinden flammane nærast ustoppelege. Vindkasta i dag er ei påminning om at det kan skje igjen.
Brannsjef Gaute Johnsgaard har difor ei oppmoding til innbyggjarane.
– Erfaringane vi gjorde oss under brannen var at vi såg at på marker og i hagar som ikkje var stelte, der fekk brannen lett tak. Difor ber vi om at folk som eit førebyggjande tiltak ryddar i hagar og på marker slik at vi unngår at vi får ein slik situasjon att.
- LES OGSÅ:
- LES OGSÅ:
– Brannsikringssauer
På eit jorde berre eit steinkast unna dei verneverdige husa påLærdalsøyri beitar ein flokk med sauer.
– Dette er brannsikringssauer, eit nytt fenomen vi har pønska ut her i Lærdal, seier landbrukssjef Magnhild Aspevik.
Ho fortel at lærdølenehar vorte ekstra forsiktige etter brannen. Sauene dei har sett i sving er til uvurderleg hjelp i kampen mot graset.
– Sauene er fantastiske beitedyr, her kan vi slå to fluger i ein smekk. Vi får utnytta ressursane, og vi får redusert brannfaren vesentleg her bak gamle Lærdalsøyri.
– Alle må ta eit tak
På rådhuset i Lærdal sit ordførar Jan Geir Solheim. Vinden utanfor kontorvindauga vekker minner også hos han.
– Eg merkar det på meg sjølv at eg tenker på der som skjedde. Vi må saman gjere det vi kan for at det ikkje skjer igjen.
Ordføraren håpar no at folk tek oppmodinga om å halde orden i hagane på alvor. Generelt meiner han lærdølene er flinke.
– I år er vi i ein spesiell situasjon. Det har vore ein god sommar og ein lang, flott haust. Dermed har graset vakse lenger enn normalt. Og så er det ikkje alle huseigarane som bur her, så det å fylgje med på alt er vanskeleg, så vi må ta eit tak.
– Plenen er nyklipt
På nærbutikken er det ikkje alle som har fått med seg ordføraren og brannsjefen sine formaningar. Men dei fleste er som Randi Aarethun og meiner at dei har alt på stell.
– Plenen min er grøn og fin og nyklipt.
Ho bur midt i området der brannen herja, men huset hennar slapp unna flammane. Ho trur alle i Lærdal har lært av det som skjedde.
– Det er eg heilt sikker på, for eg trur at ingen er så forsiktige med med varme som vi lærdøler. Vi kastar til dømes ikkje sneipar i hagen. Eg trur folk kjem til å skjere ned tre dei har i hagen. I januar hadde eg nett skore ned ei kjempestor bjørk, hadde eg ikkje gjort det hadde det gått gale.