Atløys Venner og Veteranskibslaget Stavenes slår på stortromma når dei fram til søndag arrangerer Fjordsteam i 150 årsjubilanten Florø. Det tradisjonsrike veteranbåttreffet har aldri tidlegare vore arrangert i kystbyen.
- NB. NRK.no legg ut biletserie frå Fjordsteam i løpet av kvelden.
Båtar av alle slag
44 større veteranskip, fleire eldre redningsskøyter, ei mengd forskjellige skøyter og agentbåtar, 12 - 14 veterane brannbilar og 10 - 12 bussar, 150 veteranbilar er alle samla i Florø fram til og med søndag, skriv arrangøren på si nettside.
I tillegg lokkar ein med Bondens Marknad, torghandlarar, konsertar, revy, turar, liv og røre.'
«Stavenes» er tilbake
For mange vart det eit ekstra spesielt syn då den gamle fjorddamparen «Stavenes» kom inn på hamna i 17-tida fredag ettermiddag.
Båten som for nokre år sidan nærmast var som tapt å rekne, har sågar sokke ved kai under restaureringsarbeidet i Amlabukta i Kaupanger, men ein ihuga dugnadsgjeng har nekta å gi opp det ærverdige fartøyet.
Då båten som enno ikkje er heilt ferdig restuarert og derfor måtte ha slepebåt, la til kai i Florø, stod ein representant frå Posten klar til å gjere ære på skip og mannskap.
I dag vart skipet heidra av Posten. Kvalitetssjef i Hordaland og Sogn og fjordane, Arthur Brekke.
Posten med spesiell markering
– «Stavenes» og dei andre båtane som kjem inn her til Florø i dag har hatt postføring med eigne postfolk om bord i mange år. Det ønskjer vi i Posten å markere, seier kvalitetssjef Arthur Brekke i Posten.
Som ei symbolsk handling hadde han med seg ein kontrakt som igjen gjer Stavenes til postskip. Og i ei postveske hadde Brekke med seg og ein «Stavens»-konvolutt med frimerke på.
– Nesten som eit familiemedlem
– Vi har eit spesielt frimerke vi har sett på, og originalstempel frå 1918. Men først må «Stavenes» igjen ha lov til å ha post om bord, så den kontrakten må vi få i stand. Den er mellombels fram til søndag. Men båten får ein ny kontrakt når den er ferdig restaurert, fortel Brekke som avlsutta markeringa ved å heise postflagget.
– For meg, som opphaveleg er frå Hyllestad, er det litt rart å sjå att «Stavenes» her. Den var ein av to båtar som gjekk fast i Hyllestad, og siste skipparen om bord var frå same staden som meg. Båten blir nesten eit familiemedlem, seier ein imponert Arthur Brekke frå Posten..