Thor-Christian Ebbesvik køyrde så imponerande i sin debut i Le Mans Series at internasjonal motorpresse kalte prestasjonen "på grensen til sensasjon".
Imponerande femteplass
– Daily Sportscar skreiv i helga at min prestasjon bak rattet var "well managed, emerging sensation", og det er jo ei anerkjenning å ta med seg, seier ein strålande fornøgd Thor-Christian Ebbesvik etter dagens femteplass i åpningsrunden i Le Mans Series på Paul Ricard i Frankrike.
Ebbesvik køyrer ein Zytek for Team Bruichladdich i LMP2-klassen saman med førarane Tim Greaves og Karim Ojjeh, og nok en gong var Ebbesvik desidert raskast på bilen.
Hadde startproblem
– Me hadde ikkje ein heilt ideell kvalifisering, men klarte likevel femte startposisjon. I løpet kunne me ha hamna på seierspallen, men motoren stoppa kvar gong me hadde eit depotstopp, og me brukte tid på å få starta den igjen. Men me imponerte på banen, og fekk mange gode tilbakemeldingar på køyringa, seier 26-åringen fra Bergen.
Det er fyrste gong ein nordmann deltar i Le Mans Series, og i juni skal Thor-Christian Ebbesvik òg køyre 24-timarsløpet på Le Mans, og vert der den fyrste nordmannen på 19 år.
– Eg gler meg til resten av sesongen i Le Mans Series, og spesielt 24-timarsløpet på Le Mans, seier han.
Neste utfordring for Thor-Christian Ebbesvik no er eit løp på Spa i Belgia den 9. mai, før 24-timarsløpet på Le Mans den 12. og 13. juni.