«Vert behandla som annanrangs tilsette av Jon Bolstad»

Alle ordførarane i Nordfjord var inviterte til sjukehusmøtet på Nordfjordeid onsdag kveld, men berre Roger B. Silden frå Vågsøy og sitjande varaordførar i Eid, Kjell Magne Åshammar, møtte fram.

– Mitt inntrykk er at det er ein enorm jobb att å gjere. Eit samla fagmiljø held på å rakne fordi at det som er av flinke fagfolk no rett og slett held på å forsvinne, fordi dei er leie av Helse Førde og leie av å bli behandla som annanrangs tilsette av direktør Jon Bolstad. Det er ganske sjokkerande å høyre, meiner Bjørlo.

• LES OGSÅ: Fryktar legeflukt frå sjukehuset
• LES OGSÅ: Vart utskjelt av Navarsete - no rosar sjukehusaksjonisten statsråden

Vil ikkje kommentere om dei har tillit

På direkte spørsmål frå NRK nekta faggruppa å svare på om dei framleis har tillit til administrerande direktør i Helse Førde, Jon Bolstad.

– Vi er ei medisinsk faggruppe, så det spørsmålet overlet vi til politikarane, konkluderte kommunelege i Vågsøy og medlem i faggruppa, Bengt Arne Goeren.

Siviløkonom Bjørn Myklebust la under møtet fram det faggruppa meiner er naudsynt informasjon om situasjonen ved Nordfjord sjukehus.

• LES OGSÅ: - Lite framtidsretta med anestesi
• LES OGSÅ: Trur anestesien kan opne for ny aktivitet ved Nordfjord sjukehus

– Må ut av fylket

Han hevda mellom anna at sjukehusvedtaket om nedlegging av ortopedien fører til at om lag 400 pasientar årleg vil måtte opererast utanfor fylket.

– Det står ingen andre sjukehus klare til å ta desse pasientane. Bergen manglar kapasitet, kanskje ein må til Oslo eller Trondheim. Kikholsortopedane reiser ut av fylket og ut av landet når ortopedien ved Nordfjord sjukehus vert lagt ned. Dei kjem gjerne attende dersom vedtaket vert gjort om, samt at leiing og leiarstil i helseføretaket vert forbetra, slo Myklebust fast.

Ingen vil vere att

Lege Mats Petterson hevdar at ingen av ortopedane ved Nordfjord sjukehus vil halde fram i Helse Førde, dersom ortopedien på Nordfjordeid vert lagt ned.

– Dersom dei gjer alvor av å leggja ned ortopedien, så vil ingen av oss som er ortopedar her vera med vidare. Ingen av oss kjem til å flytte til Førde, sa Petterson under sjukehusmøtet på Nordfjordeid onsdag kveld.

Spesialist i indremedisin og kardiologi, Henrik Berg, sa under møtet at liv vil gå tapt om ikkje akuttberedskapen blir oppretthalden.

– Akuttbehandling skal ikkje sentraliserast, men vanlege menneske si ulukke må desentraliserast. Det kan ikkje desentraliserast til ambulansar og helikopter, sa han.

– Vi må halde oss til vedtaket

Administrerande direktør i Helse Førde, Jon Bolstad, seier at dei som var på møtet vil bli skuffa.

– Vi må halde oss til dei vedtaka regjeringa har fatta. Vi skal leggje ned det ortopediske tilbodet ved sjukehuset, det er bestemt. Det er behandla i alle organ som skal behandle det. Den saka er ferdig, seier han.

Når det gjeld Alfred Bjørlo sin kommentar om at legane blir behandla som annanrangs tilsette, har Bolstad denne kommentaren:

– Det er heilt ukjent for meg at eg skulle gjere det. Eg veit ikkje kva grunnlag han har for å seie dette, seier han.