– Det er synd å miste Bjørn Inge. Han er ein spelar vi har satsa mykje på. Både spelarutviklar Per Øyvind Mortveit og toppspelarutviklar Kolbjørn Fosen har brukt mykje tid saman med han. Det var surt å få beskjeden om at Bjørn Inge har alt Sogndal, seier sportssjef i KH, Asbjørn Helgeland til Haugesunds Avis.
Helgeland trur likevel dette er ei avgjerd Utvik har tenkt nøye gjennom.
– Så vidt eg har forstått har han fått eit tilbod som tilseier at vegen til eliteseriespel er kortare i Sogndal enn han hadde vore i Haugesund, seier Helgeland.
Skal ha fått lovnader om å bli satsa på
Også faren til stoppartalentet stadfestar at sonen har gått over til sognelaget.
– Alt skjedde veldig fort. Bjørn Inge signerte kontrakten ikkje lenge etter at han gjekk av flyet i Sogndal, forklarar Utvik til avisa.
Han legg til at det var utslagsgjevande for valet av klubb at Utvik har fått lovander om at han er éin av to spelarar som skal satsast på.
Utvik gjekk frå Avaldsnes til FKH i fjor. Han har spelt både for G15 og G16-landslaget, og er no i G17-troppen.