Kvar femte tilsett ved norske sjukehus er byråkrat

- Det er veldig provoserande at staten legg ned fødeavdelinga ved Nordfjord sjukehus samstundes som det er så mange byråkratar i helseføretaka, seier Christel Midtgaard Angelshaug frå Måløy.

Midtgaard Angelshaug fekk sitt fjerde born på måndag og er letta over å få føde no, og ikkje om eit år. For då er nemleg fødeavdelinga ved Nordfjord sjukehus lagd ned.

• LES OGSÅ: Ofrar fødetilbod på lokalsjukehusa

I tillegg til Nordfjord, bestemte regjeringa i april å redusere fødetilbodet også i Lofoten, Lærdal og Odda.

- Kutta skapar stor uvisse blant dei gravide, seier Midtgaard Angelshaug.

17 000 helsebyråkratar

Midtgaard Angelshaug er ei av mange som er opprørte. For medan regjeringa kuttar i pasienttilbod, jobbar kvar femte i helseføretaka med byråkrati.

Berre i Sogn og Fjordane er det 328 helsebyråkratårsverk, i eit fylke med tre små sjukehus.

I heile landet utgjer byråkratar, sjefar og kontorfolk totalt 16921 årsverk, viser 2009-tal frå Statistisk sentralbyrå. Det betyr at over 18 prosent jobbar med administrasjon i norske helseføretak.

• LES OGSÅ: Dette er sjukehusstriden i Norge
• LES OGSÅ: Strid i regjeringa om sjukehusa

(Artikkelen held fram under biletet)

Sterke reaksjonar

Blant pasientane utanfor Nordfjord sjukehus er reaksjonane sterke.

- Eg tykkjer vi må spørje regjeringa og politikarane om det er denne utviklinga dei verkeleg vil ha, seier Aina Jøranli Heggen frå Nordfjordeid.

- Oi, det var fleire enn eg trudde. 17000 byråkratar er altfor mykje, seier Vidar Bolstad frå Sandane.

Han meiner at helseføretaka burde kutta i administrasjon før dei legg ned sjukehustilbod til pasientane.

• LES OGSÅ: Lokalsykehus uten akutt og føde
• LES OGSÅ: Navarsete kritisert av sjukehusforkjempar

Ingen stordriftsfordelar

Helseføretaket i Sogn og Fjordane, Helse Førde, ville kutta endå meir i pasienttilbodet enn det regjeringa til slutt tillét. Her auka talet på byråkratårsverk med ti prosent frå 2008 til 2009.

På landsbasis blei det 808 fleire byråkratar det året. Det er siste tilgjengeleg statistikk.

- Det er klart at ein kan seie at det er mykje, men vi er eit lite føretak som ikkje har stordriftsfordeler, seier styreleiar i Helse Førde, Clara Øberg, og legg til:

- Hjå oss blir tala dessutan ikkje heilt rette fordi til dømes seksjonsleiarar jobbar både med pasientar og administrasjon.

- Forstår du at folk som misser helsetilbod har vanskar med å akseptere at det er så mange byråkratar?

- Ja, det forstår eg, men eg trur at storleiken på administrasjonen i Helse Førde er der vi skal liggje, seier Øberg.