Sjekkar 5000 hytter natt og dag i påska

I Noregs fjerde største hyttekommune, Vinje, tar kommunen rekninga når eit vaktfirma patruljerer absolutt alle hyttene i påska. – Vi måtte gi noko tilbake til hytteeigarane, seier ordføraren.

Hytter i Holtardalen i Rauland

TOMME HYTTER: I påska myldrar det vanlegvis av turistar i Holtardalen i Vinje. Denne påska er det skvær tomt.

Foto: Ragnar Lurås / NRK

Denne artikkelen er over en måned gammel, og kan inneholde utdaterte råd fra myndighetene angående koronasmitten.

Hold deg oppdatert i NRKs oversikt, eller gjennom FHIs nettsider.

Om hytta di blir sjekka eller ikkje i påska, kjem heilt an på kva kommune du har hytte i.

I Vinje fann ordførar Jon Rikard Kleven ut at det var lurt å strekke ut ei hand til hyttefolket sitt.

Spesielt fordi han har gått så langt som å true med å stenge ned hyttefelt om det kom folk dit.

– Det er kjedeleg om vi først går i bresjen for hytteforbodet, for så å oppleve at hytteeigarane blir plyndra når stadene deira står tomme, seier Kleven.

Jon Rikard Kleven, ordfører Vinje

VAKTSELSKAP: Vinjeordførar Jon Rikard Kleven meiner dei får mykje tilbake for å betale for at eit vaktselskap sjekkar hyttene i påska.

Foto: Stian Wåsjø Simonsen / NRK

Eit privat vaktselskap er allereie i gang med tilsynsjobben.

– Dei køyrer rundt i alle hyttefelta våre heile døgnet. Vi måtte gi noko tilbake når vi avlyste påska.

Ordføraren reknar med at vakthaldet vil koste kommunen minst 300.000 kroner.

Får hjelp av politiet

I Noregs største hyttekommune, Ringsaker, har dei ein heilt annan strategi.

– Vi har fire store grunneigarar som har eigne folk i fjellet heile tida. Kommunen stiller derfor ikkje med eige oppsyn, seier ordførar Anita Ihle Steen.

– Er det eit godt nok tilbod til hyttefolket, då?

– Ja, det meiner eg. Vi har hatt gode møte om dette, og politiet vil òg køyre rundt og passe på.

– For dyrt

I kystkommunane Kragerø, Bamble og Færder stiller dei heller ikkje opp med noko ekstraservice til hyttefolket.

– Vi har i overkant av 3500 hytter spreidd rundt i skjergarden, så tilsyn ved alle desse ville blitt dyrt for oss, seier ordførar i Kragerø, Grunde Knudsen.

Til gjengjeld er det meir politi på vatnet denne påska, og taxibåtnæringa følgjer òg med, fortel Knudsen.

Kragerø

SPREIDD: I kystkommunen Kragerø reknar dei med at hytteeigarane sjølve får nokon til å sjekke hytta som står tom i påska.

Foto: Sindre Skrede / NRK

– Ser kva kommunar som bryr seg

Noregs Hytteforbund seier dei forstår at mange er bekymra for fritidsbustadene sine i desse dagar.

Spesielt dei som har hytter som ligg for seg sjølv, og ikkje i dei store hyttefelta.

– Det er fint å høyre at nokon tilbyr tilsyn. Då ser ein kva kommunar som verkeleg bryr seg mest om hytteeigarane sine, seier styreleiar Trond Gulleik Hagen.

Forbundet rår hytteeigarar til å dra på dagstur til hytta viss ein kan, og hjelpe kvarandre viss ein kjenner andre som har hytte i same område.

– Hyttene står tomme resten av året òg. Forskjellen no er at absolutt alle er tomme, og at alle veit om det, legg Hagen til.

Status Norge

Sist oppdatert: 30.05.2020
8425
Smittet
28
Innlagt
237
Døde