Kvinna sat på Rixos Hotell i hovudstaden Tripoli og snakka med utanlandske journalistar då representantar frå regjeringa kom for å hente ho.
Journalistane var på hotellet som gjester av den libyske leiaren Muammar al-Gaddafi.
Kvinna, som presenterte seg som Eman al-Obaidi frå Benghazi, hadde kome seg forbi sikkerheitsvaktene.
– Urinerte på meg
Journalistane som til vanleg deltek på pressekonferansane til regimet, fekk sjå ho vise fram arr og sår på kroppen, som ho fortalde at Gaddafi-trufaste soldatar hadde påført ho.
Ho sa ifølgje The New York Times at ho vart valdteken av 15 menn, og hevda at overgrepa var filma.
– Dei hang meg opp, gjorde frå seg på meg og urinerte på meg.
– Dei seier at vi alle er libyarar, og at vi alle er eitt folk. Men sjå kva Gaddafi sine folk gjorde mot meg, sa ho.
Då sikkerheitsvaktene fekk med seg kva som skjedde, greip dei inn, skriv The Guardian.
Frakta vekk i bil
Kvinna nekta å vere med, og prøvde å slå seg laus medan ho ropte og skreik.
– Nei, nei, nei, nei! ropte ho.
Journalistane som prøvde å stanse mennene i å ta ho med, vart dytta unna av sikkerheitsvaktene.
Kvinna vart kvinna dregen med ut frå hotellet, medan journalistane vart nekta svar på spørsmål om kvar ho vart teken med.
– Eg veit ikkje, eg veit ikkje, eg veit ikkje kvar dei tek meg, skreik ho før ho vart dytta inn i ein bil og frakta vekk.
Sjå The Telegraph sin video frå hendinga: