Nær ein halv million menneske utan straum etter «Idalia»

Etter å ha herja i Florida bevegde onsdag kveld den tropiske stormen «Idalia» seg mot Georgia og Carolina-delstatane.

Då stormen trefte land var det ein kategori 3-orkan med vindhastigheit på over 33 meter i sekundet.

Meir enn 1500 føderalt tilsette hjelpemannskap er kalla ut av president Biden for å assistere med søk og redning i dei råka områda søraust i USA.

Ifylgje National Hurricane Center er det venta mellom 100 og 200 millimeter nedbør ved Florida sin vestkyst, søraustlege Georgia og austlege delar av Nord- og Sør-Carolina torsdag.

Innbyggjarar blir no innstendig bedne om å halde seg vekke frå vatn, og halde seg heime.

– Tre er nedrivne, vegar er oversvømde. Snu om du møter på vatn, uttalte sheriff-kontoret i Charleston.

Allereie onsdag rekna ein at 12 millionar menneske var påverka av uvêret.

Enormt oppryddingsarbeid

Ifylgje CNN var det onsdag kveld meir enn 460.000 straumlause i Florida og Georgia.

Somme stader førte stormflo til at vasstanden steig med nesten fem meter. I Pasco County nord for Tampa i Florida har mellom 4000 og 6000 bustader blitt skada av overfløymingar.

To menneske er så langt stadfesta omkomne i Florida. I delstaten Georgia nord for solskinnstaten døydde ein mann då han forsøkte å rydde ein motorveg, etter å ha blitt treft av eit tre, ifylgje Sheriff Ashley Paulk i Lowndes county.

– Kan ikkje fornekte klimaendringane

Stormen bevega seg raskare enn vanleg, og gjorde med det fortare store skadar over større område.

Ifylgje meteorologar i USA kan det uvanlege fenomenet mellom anna forklarast med høgare temperatur i havet.

USA sin president Joe Biden orienterte onsdag kveld om omfanget av den tropiske stormen. Det kvite hus har lova dei råka områda all føderal hjelp som trengst.

– Ingen kan lenger fornekte konsekvensane av klimaendringane, sa Biden på pressekonferansen.