Minst 50 palestinarar er drepne og over hundre såra i israelske angrep frå luft, sjø og land mot byen Khan Younis.
Den siste veka har Israel intensivert angrepa mot den største byen sør på Gazastripa.
Israelske stridsvogner har måndag kryssa byen frå aust til vest og tatt seg fram til Middelhavet.
Innbyggjarar fortel at byen blir utsett for dei hardaste angrepa i sør sidan krigen braut ut 7. oktober i fjor.
Røyk stig frå byen Khan Younis etter måndagens angrep. Her sett frå Rafah i sør.
Foto: ReutersIntense kampar
Den norske legen Erik Fosse oppheld seg på Det europeiske sjukehuset i byen og fortel om harde kampar i ei melding til NRK.
– I natt var det intense kampar om Khan Younis med mange eksplosjonar nær sjukehuset. Definitivt dei kraftigaste angrepa vi har opplevd under vårt opphald her, seier han.
Fosse oppheld seg i området saman med fleire norske legar og sjukepleiarar leia av Norwac. Dei kom til Gazastripa 10. januar.
Legg på flukt
Sidan krigen braut ut, har fleire hundre tusen flukta sørover frå Gaza by til Khan Younis, etter ordre frå Det israelske militæret. Dei fordrivne oppheld seg i områda som no blir bomba.
Mesteparten av Gaza sine 2,3 millionar innbyggjarar oppheld seg no i anten Khan Younis eller Rafah lengst sør mot grensa til Egypt.
Mesteparten av Gaza sine innbyggjarar har flykta hit, til byen Rafah i sør. Røyken i bakgrunnen er frå måndagens angrep mot Khan Younis.
Foto: REUTERSLege Erik Fosse fortel vidare om folk som demonterer telta dei bur i og lesser innhaldet opp i lastebilar.
– I morgontimane var det nesten folketomt i dei provisoriske gatene mellom telta på sjukehusområdet, seier han til NRK.
Den internasjonale Røde Kors-komiteen melder at 10.000 fordrivne som hadde søkt tilflukt ved Det europeiske sjukehuset, har reist i løpet av det siste døgnet.
– Sjukehuset seier at 10.000 fordrivne har forlate sjukehusområdet i løpet av natta. Det var om lag 22.000 her i utgangspunktet. Dette er vanskeleg å verifisere, men det kan stemme fordi det yrande livet vi er vane med er borte vekk, seier den norske legen.
Ahmad Shurrab er ein av dei som har lagt på flukt måndag.
– Dette er den 17. gongen eg legg på flukt. Kvar skal vi dra? Skal vi til Rafah? 2,3 millionar menneske på eit bittelite område. Kva vil dei med oss? seier han oppgitt til Associated Press.
Fryktar fleire daude
Ashraf al-Qedra, talsperson for Gaza sitt helsedepartement, seier til nyheitsbyrået Reuters at han trur dødstala vil auke.
– Vi trur at mange ligg fastklemt under ruinar i område som okkupasjonsstyrkane har invadert, der redningsarbeidarar ikkje når fram til dei, seier han.
Innbyggjarane får seg ikkje til byens sjukehus - og redningsarbeidarar når ikkje fram til områda som er bomba for å evakuere skadde.
– Vi fekk ikkje inn så mange skadde fordi ambulansane ikkje kunne evakuere dei. Måndag er ingen tilsette som bur i Khan Younis på jobb, fordi vegen er stengt av Det israelske militæret. Men det er framleis mogeleg å reise til og frå Rafah, fortel Erik Fosse.
Erik Fosse og resten av Norwac-teamet kom til Gazastripa frå Egypt 10. januar.
Foto: NTBOmringa sjukehus
Det israelske militæret seier operasjonen i Khan Younis vil halde fram i fleire dagar.
Israel hevdar at Khan Younis fungerer som Hamas sitt hovudkvarter fordi fleire sentrale leiarar kjem frå byen.
Ifølge IDF er om lag 40 Hamas-medlemmar drepne i angrepa.
Palestinarar i Khan Younis leitar etter overlevande i ruinane etter eit israelsk luftangrep mot byen. Biletet er tatt 26. oktober i fjor.
Foto: APStridsvogner har måndag nådd fram til to ulike sjukehus i byen der dei sperrer inngangane.
Det israelske militæret meiner Hamas opererer i og ved sjukehusa, noko Hamas avviser.
Al-Khair-sjukehuset vest i byen har blitt storma av israelske soldatar som har pågripe tilsette, fortel ein talsperson frå Gaza sine helsestyresmakter.
Palestinsk Røde Halvmåne seier til nyheitsbyrået Reuters at dei har mista all kontakt med deira tilsette på Al-Amal-sjukehuset der israelske stridsvogner står parkert utanfor.
– Området er fullstendig omringa. Ingen kjem verken inn eller ut. Vi er svært bekymra for tryggleiken til våre tilsette, dei skadde og dei tusenvis av fordrivne som oppheld seg der. Situasjonen er ekstremt farleg, seier talsperson Nebal Farsakh.
Talsperson John Kirby talte i Det kvite hus måndag kveld, der han sa at Israel har rett til å forsvare seg sjølv, men presiserte at USA ikkje ynskjer å sjå at sjukehus blir til krigssoner.
– Vi har vore veldig klare på at Israel må beskytte uskuldige pasientar og medisinsk personell på sjukehus så godt som mogeleg, sa Kirby.
– Dei laug
Lenger vest har israelske stridsvogner for første gong nådd al-Mawasi-distriktet ved middelhavskysten.
Der har dei tatt oppstilling ved al-Aqsa-universitetet som husar fordrivne familiar.
Midt i kaoset står Yunis Abdel Razek som har søkt tilflukt på universitetet saman med familien.
– Det har vore artilleriangrep utan stans sidan klokka 05. Vi kan ikkje forlate universitetet. Det er farleg og eg er redd for dei små. Dei sa Al-Mawasi-området var trygt, men dei laug, seier han fortvila.
Over 25.000 palestinarar er drepne i israelske angrep mot Gazastripa sidan krigen braut ut 7. oktober i fjor, viser tal frå palestinske helsestyresmakter.
